繼早前藝人蓋世寶離開TVB，另一經典兒童節目主持人李天翔都宣布要離巢，搞到好多觀眾都不捨。TVB兒童節目陪伴唔少人成長，從《閃電傳真機》到《至NET小人類》再到《放學ICU》，相信各位點都有睇過，算得上香港市民嘅集體回憶，大家一定會好奇，節目入面其他主持人們近況又係怎樣呢？
李天翔
李天翔入行超過二十年，早年憑扮演「認字特警」而廣受小朋友歡迎，嗰句「我係認字唔認人嘅認字特警」真係夠經典。李天翔其後轉向戲劇組發展，多演岀壞人等配角，不過亦算入屋，觀眾對佢印象唔錯，但近日喺社交網絡宣布離開TVB，令很多人感到不捨。
(TVB電視截圖)
蓋世寶
蓋世寶喺TVB有18年主持兒童節目經驗，自從2014年無綫兒童節目大改革後，星途一直不甚理想，喺電視劇一直只能做閒角，仲試過整套戲只得一句對白。日前TVB同佢傾續約，以「唔夠騷」為由要減佢三分一人工，預料將減至7000元月薪，最終蓋世寶決定離開TVB。
(TVB電視截圖)
譚玉瑛
譚玉瑛姐姐名字相信無人不曉，由1982年嘅《430穿梭機》到2千年《放學ICU》，佢係唯一當過所有兒童節目嘅主持人，喺好多香港人心目中童年回憶。離開兒童節主持後，TVB曾安排佢做《東張西望》記者，現時主力與鼎爺合作《阿爺廚房》，節目得到唔少好評，長拍長有，喺TVB地位依舊穩固。
(TVB電視截圖)
魯文傑
魯文傑係《閃電傳真機》主持人，又擔任過1994年TVB兒童節大使。近年佢話喺劇界發展得幾好，曾經憑《藍月亮》、《野鴨》同《大顛世界》獲提名香港舞台劇獎最佳男配角及最佳男主角，現時係香港話劇團戲劇嘅課程導師同海洋公園合約節目經理。
羅貫峰
提起羅貫峰，除咗記得佢做過《大冬瓜》同《十兄弟》之外，其實佢亦曾經擔任《至NET小人類》同《閃電傳真機》主持。直到2012年，佢結束同TVB長達17年賓主關係，近年已淡岀娛樂圈，努力搞生意為主，2015年於在尖沙咀開設三層式BBQ酒吧，又同中學同學係深水埗開火鍋海鮮小炒店，前年仲喺佐敦開設醫務中心，絕對係一位「生意達人」。
張美妮
自《至Net小人類》停播之後，佢就開始轉型，有不少拍劇和主持的機會，經常出現喺曾志偉獎門人節目入面，其後佢經營髮型屋同餐廳生意做老闆，上年同結婚十年嘅老公宣布有喜，預產期係今年六月。
張潔蓮
張潔蓮曾參選1995年度香港小姐競選。加入TVB後長期擔任兒童節目主持，直到2006年與TVB解約。離開TVB後佢曾喺荃灣荃經營糖果店，後來擔任幼稚園教師一段時間。近期打算同男朋友袁文傑結婚，但因男方媽咪突然離世，事件令袁文傑傷心不已，心情仍未平復，現時婚禮亦無限期延遲。
伍文生
伍文生最令人印象深刻，一定係《閃電傳真機》所飾演的「吱吱鼠」，因在每句說話後面都加上「吱吱」兩聲，諧趣形象令他成為小朋友喜愛主持之一。伍文生現時已離開娛樂圈，之後同圈外女友結婚後移民到澳洲，育有兩子一女。2013年回流香港向經營茶餐廳的岳父學藝，之後開設蛋牛治外賣專門店，其後陸續開張分店，前年佢仲創立婚禮司儀公司，事業發展唔錯。
唐韋琪
唐韋琪曾經係《閃電傳真機》同《至NET小人類》主持，2007年退出後兒童節目後自組「韋琪娛樂製作」公司，為自己推出唱片《知己》EP，除咗繼續唱歌，都開設才藝學校「唐韋琪才藝訓練中心」，從事教育兒童歌唱及繪畫工作。唐韋琪近年亦曾以歌手身份登上TVB節目《流行經典50年》舞台唱歌。
(TVB電視截圖)