唔單止兄弟姊妹好似樣,明明冇血緣關係但撞臉嘅情況都好多,娛樂圈裡面就有唔少藝人姿勢、氣質、神態或者身形好似,令人瞬間有臉盲症!你又可唔可以分辨出佢哋呢?依家就為你數出12位似到好似同一個父母生嘅藝人出嚟啦。
1. 張曦雯 鄭裕玲
呢排喺網上面都瘋傳張曦雯嘅靚相,唔少網民發現同佢Dodo姐鄭裕玲勁似樣,同樣有個尖下巴、高鼻、瘦臉,優雅大方嘅氣質仲好相似添!唔知張曦雯第日可唔可以做到Dodo姐咁德高望重,受人尊敬嘅大明星呢?
2. 黃心穎 蔡一智
黃心穎選完港姐初出道嗰陣仲係留住黑色長直髮,個樣同蔡一智真係好似,相似度根本達99%。雖然被網民拎嚟同男人比較,不過黃心穎一啲都冇介意,仲同蔡一智影相問大家似唔似!認真玩得。
3. 盧覓雪 阮兆祥
雖然佢哋係一男一女,不過兩個都擁有一對大眼、包包臉,同充滿福氣嘅身形。所以佢哋曾經試過上搞笑綜藝節目扮雙胞胎,成功吸引觀眾留意。
4. 湯洛雯 倪晨曦
兩個都係女神,兩個樣同他氣質都好似。之前愚人節佢哋已經玩過大家一次,當時佢哋一樣著上白色雪紡衫、束咗條小高辮,仲要將對方幅相交換post喺自己instagram度,結果真係有好多人蒙在鼓度,分唔清佢哋。
5. 王祖藍 黃光亮
佢哋最大相似點就係個鼻!一樣擁有一個大鼻、粗眉、細眼,所以飾演父子就最啱喇,唔使搵第二個。
6. 蔡思貝 達哥
大部份時間束短髮嘅蔡思貝一直被指同網絡紅人達哥猶如兄妹,仲幫佢改咗個名叫「蔡思達」,話如果失散咗都一齊可以搵得返大家。以前蔡思貝好介意,每次提起都頻頻黑面,不過後來佢已經接受咗,仲主動要同達哥friend。
7. 張智霖 張振朗
外表帥氣嘅張振朗啱啱入行嗰陣已經被人話好似男神張智霖,咁啱嗰排播緊《衝上雲宵2》,所以佢著起機師制服直接扮劇中嘅cool魔。唔單止咁,佢把聲仲勁似張智霖,唱「天氣不似預期...」嗰陣嚇窒唔少觀眾。
8. 森美 Otto 王大陸
佢哋3個直頭好似3胞胎咁,分唔到邊個打邊個,一個DJ兼主持,一個歌手,一個台灣藝人,擺埋一齊仲以為係一家人添!
9. 曹永廉 張衛健
雖然好少人講過佢哋似樣,但只要搵返曹永廉20歲嗰陣個樣,就會知道佢哋似到咩程度。不過人大咗,臉部輪廓都有變化,所以大家先覺得佢哋冇咁似。
10. 方力申 石修
佢哋兩個成日俾人以為係親生父子,以前方力申仲係游泳運動員參加東亞運動會嗰陣已經被人叫做「少年石修」。