在TVB處境劇《愛．回家之開心速遞》以大小姐身份與送水輝譜出女尊男卑戀情的林淑敏人氣高企，只因她戲中惡過人，次次發火都中氣十足，讓劇集增添不少趣味性，甚至因此角成功奪得「最佳女配角」，為處境劇吐氣揚眉。但其實林淑敏的42年的人生波折重重，2000年林淑敏加入TVB一直都是演一些不起眼的角色，收入亦只僅夠糊口，而到2010年更加不幸更確診患上第2期乳癌，苦不堪言。幸而患難見真情，老公除咗在化療時不離不棄為她煮飯，更加誓要娶她過門，如今不捨得她生小朋友之苦，寧願不做爸爸。近日林淑敏上商業一台接受主持人梁泰來訪問，電台節目大爆抗癌當中的辛酸，又大讚她老公的感動行為。
(TVB電視截圖)
(TVB電視截圖)
患癌頂唔順親手掹甩頭髮
林淑敏由得知自己有乳癌去到做手術過程好快，但之後經歷抗癌的痛苦時期才是真正漫長的日子，成個苦不堪言的療程歷時近年半：「當時成個人好沉重，過程好快，由檢查、抽針、到通知，其實都只係3、4日內嘅事。之後醫生話唔單止要打化療，仲要打標靶藥，因為我嗰隻Cancer係最惡嗰種。嗰陣甩晒頭髮，去到第17日頭皮嘅毛孔張開晒，好似有針拮咁，跟住算喇，我攞住個篩入廁所親自掹甩晒啲頭髮，個頭光晒。好在我有信仰，所以我就祈禱，一邊祈禱我就一邊消化（呢件事），最後我就覺得要將所有治療做盡，如果唔係就會後悔。」
甘願賺錢養家又做煮飯公 老公承諾照顧一生
對港姐出身的林淑敏來說，要光頭打擊都幾大，但多得另一半陳中原悉心照料，才可以堅強捱過：「我記得嗰陣佢唔太識煮飯，佢最拿手就係煮公仔麵，平時飲可樂食薯片。但自從佢知道我病之後，每日都去街市買餸，煮飯俾我食，我每日都有5餸一湯。同埋我對癌症嘅知識好貧乏，係佢日日上網睇相關資料然後話俾我聽。」在愛情天天滋潤下，林淑敏終於完成所有療程，宣佈抗癌成功，身體慢慢康復中。
除咗重病之外，女人一生最怕就是嫁錯郎，嫁到一個根本不愛，不心疼自己的人，幸而林淑敏與另一半真正患難見真情，對方不僅沒離棄自己，甚至等待自己康復後便立即向自己求婚：「佢嗰陣話：『咁其實依家點㗎啫，你究竟結唔結，想唔想同我結？』，我覺得佢係咩都冇所謂，結婚就得㗎喇。」明明另一半好愛自己，林淑敏這時候卻想縮沙：「我真係驚，雖然我已經好返，又死唔去，但始終當時適逢係生育年齡，我有過呢個病，未必生到小朋友，同時亦意味住我未可以俾到個家庭佢。」最後對方沒有介意，二人在2013年結婚，結束13年愛情長跑結為夫妻。
林淑敏食足5年藥 跟得老公決定為愛拒做爸爸
林淑敏很喜歡小朋友，見到其他人的bb就會攬住唔放，本來想做一個幸福媽媽生下一代，覺得只差生兒育女便是一個美滿的家庭。沒想到老公為了她的健康著想，為免癌症復發再有生命危險，竟然禁止林淑敏生bb：「坦白講好多生過乳癌嘅人，尤其係後生女，生理週期係比較差，可能每28天都係冇（月經），但係我冇受影響，生理週期依然係正常，意味著我生小孩係冇問題。但我家族遺傳荷爾蒙過高，所以我都需要食抑制劑接受荷爾蒙治療，要食5年。5年之後其實我可以選擇唔食然後生bb，醫生都好想我生，話生咗可以當一個案例俾佢哋睇。點知我返去問老公，佢話唔好生，呢10個月係好麻煩，同埋佢驚我荷爾蒙有變化，增加（癌症）復發嘅機會。」
聽完老公寧願保住心愛的自己，也不要做爸爸，林淑敏好感動，更表示識到呢個男人好幸福：「我做空姐嗰陣去卡啦ok，經朋友介紹認識到佢，好似猶如相睇咁，我嗰時唔知佢咁浪漫，真係要經歷先知人品係好好。我以為佢結婚之前已經好錫我，但結婚之後佢對我更加好。我可以搵到一個咁愛錫我嘅人，對我嚟講呢個真係一個成就，其他嘢都唔係。」不僅林淑敏，好多網民都好羨慕她有始此好老公，紛紛鼓勵她：「有冇小朋友唔太重要，老婆生命最重要，健康身體都未必一定會有小朋友，要有小朋友係一種緣份。」、「不幸係你曾患重病，但幸運係你有個為自己着想、真係愛錫你嘅老公。勿勉強要小朋友，兩個人相愛相惜就足夠，好好享受擁有嘅一切。」