「火雞姐」丁可欣避談醜聞 受害人繼續狂爆被欺凌真相

原本24歲的YouTuber丁可欣靠火雞姐形象迅速上位，前年以歌手身分正式出道並推出第一隻歌，今年又有機會參演賀歲片《恭喜八婆》，網紅、歌手、演員3個角色齊發，前途一片光明。可惜自從前排丁可欣遭舊同學在討論區踢爆中學時期曾盜竊及欺凌後，形象大跌，即使公開道歉，揚言會賠償受害人損失都未得到大家原諒。如今醜聞愈演愈烈，有受害人繼續爆料，還原當時被欺凌的真相，聲稱被丁可欣毀掉前途。對於受害人的指控，丁可欣只回應：「聯絡咗幾位相關同學」，卻未敢講賠償金額。有聲音質疑丁可欣無心向受害人賠償，違反當日承諾。

{{hket:inline-image name="16.jpg"}}{{/hket:inline-image}}

醜聞愈演愈烈 受害人再爆被欺凌真相

丁可欣一向以親民、搞笑形象示人，想不到她就讀中學期間不但盜竊同學手提電話、借錢不還，更加連同朋黨在學校、網絡欺凌看不順眼的人。雖然丁可欣已經即時在Instagram承認一切罪行，並受害人誠心道歉：「正努力改變，學做一個好人」，又請求大家給予聯絡資料讓她賠償當年損失，可是有受害人就繼續爆料，甚至要求她退出娛樂圈。那位受害人圖文並茂，自稱與丁可欣同為大埔羅定邦中學學生，表示以前如果告發就會被打，即使向老師求助，老師沒有伸出援手，反而叫受害人啞忍：「佢喺中學係個胖虎小霸王嘅角色，佢身班有一群為咗唔被佢欺凌以及本身同佢就好熟嘅小夫，其他大部分唔係佢哋嘅朋友就係做緊大雄。以丁可欣為首嘅欺凌4人組會不斷玩弄唔順眼既同學，玩佢、打佢。點解會無老師理？因為老師同佢哋熟，叫我哋忍住唔好出聲。學校係個地獄，電話一定要跟身，佢偷咗係教精你，偷完仲要有冤無路訴，學校唔理，同學幫唔到你，想報警，只要諗起返到學校會比佢打，我都唔敢。」

受害人仲憶述新電話被踩落地磨爛的往事：「打人不在話下，本人有次行過小食部跌咗屋企人新買一星期嘅電話落地，被丁姐當波咁踢，新電話變到用咗2-3年咁花。佢地唔會明一個屋企人送嘅新電話意義同一個中學生有幾重要。踢完丁姐仲要雙手插晒裙袋企我面前講：『 哎，唔好意思喎，我以為係個波，下次小心啊』明唔明我哋係有幾怕返學？幾怕見到佢？唔係拍段片照對白讀就當道歉，唔好話我唔俾機會佢，佢嗰陣有冇俾機會我哋？我讀咁多年中學佢都係咁，邊個可憐我？」除此之外，我們還找到舊同學爆料：「丁可欣同體育老師好friend，做咩都為所欲為。當老師叫佢收斂吓，佢竟然連老師都鬧。所以以前個個見到佢都會避開，去廁格都要去第二層，好驚佢。」

{{hket:inline-image name="13.jpg"}}{{/hket:inline-image}}

睇完受害人自白，一眾網民都好激動：「我曾經都被欺凌，本來我好欣賞你，但知道你係校園欺凌者後無法追隨你，你已經不能彌補被欺凌者多年心理陰影」、「調查顯示童年被欺凌者長大後抑鬱概率係他人4.8倍，你已經毀咗好多人前途」等。

丁可欣避談賠償金額 涉嫌欺騙公眾

昨晚賀歲片《恭喜八婆》搞慶功宴，丁可欣都有份出席，對於有受害人將當年疑似真相放上網以及賠償進展，她沒有最新回應：「我冇再睇咁多回覆嗰啲，大部份我要回應嘅都喺條片度回應咗，亦都已經聯絡咗幾位相關同學，希望大家明白我，我會繼續喺未來做好自己。」反而問及當年盜竊所涉及的金額，丁可欣就坦言已經忘記：「因為真係已經比較耐之前嘅事，都成10年前，我冇一路記喺心。」最後話自己前途沒有受影響，未來將會依舊於社交平台上拍片、創作跳舞新歌、傾舞台劇角色等。 然而丁可欣避談盜竊、賠償金額的行為就被網民質疑是否真心想改過，認為她道歉只是門面功夫。有見及此，丁可欣於Instagram發新相，被人認為似乎想借劇照抒發感情：「喺呢個年代，如果您仲識得去愛人，咁，我真係恭喜您呀」，一眾網民仍然不受落，依舊留言炮轟，睇嚟丁可欣要重新獲得粉絲支持以及大家的信任，還有很大段路要走。

{{hket:inline-image name="14.jpg"}}{{/hket:inline-image}}

(丁可欣IG截圖)

{{hket:inline-image name="11.jpg"}}{{/hket:inline-image}}

(東星娛樂)

{{hket:inline-image name="15.jpg"}}{{/hket:inline-image}}

(丁可欣IG截圖)