TVB清談節目《後生仔傾吓偈》,頗受年輕觀眾歡迎,除咗有主持陸浩明、馮盈盈、麥明詩,最緊要係一眾學生KOL,每集大家齊齊傾啲貼地話題。節目做咗咁多集,你哋又了唔了解呢班後生仔呢?
黃凱儀(波波)
波波係香港城市大學專上學院嘅學生,佢人如其名,身材比較岀眾,不時身穿暴露身材嘅衣服上節目,加上言行作風大膽,多次喺節目中爆出金句,除咗話喺屋企唔著衫周圍走,仲話鍾意同細佬攬住沖涼,令人嘩然,兼有無限想像空間,成功上位。其後波波成為Big Big Channel旗下一嘅KOL,亦有上TVB健康節目《食得好健康》同商台903節目《公子會》做嘉賓。
林正峰(阿楓)
阿楓大學讀香港大學社會工作學系,畢業後做咗一排註冊社工,自加入《#後生仔傾吓偈》就專心做主持,成為Big Big Channel其中一位KOL。最近有份主持《Ben Sir睇樓團》同《安樂窩》。
鄧家禮 (Vincent)
Vincent本身係香港浸會大學音樂系畢業,佢自細喺加拿大生活,2016年喺多倫多大學音樂同教育系學士畢業,曾參加過 USTAR 2016 校花校草選舉,並贏得冠軍。
杜穎珊 (Sandy)
21歲嘅Sandy,喺城市大學修讀環保政策。睇佢一身古銅膚色,就知佢係運動愛好者,而且仲要動靜佳宜。瑜伽、潛水、跳舞同獨木舟通通都難佢唔到。學咗瑜伽7年嘅佢,最近仲考咗瑜伽導師證書。其實佢細細個已經入選香港體操總會嘅藝術體操精英隊,16歲仲喺新加坡國際瑜伽比賽中,拎到4面金牌,真係估佢唔到!
劉子碩(William/小碩)
來自台灣的大學生,畢業於新北市私立莊敬高級工業家事職業學校嘅表演藝術科,外貌靚仔又young。佢喺節目係操一口「唔咸唔淡」嘅廣東話溝通,勁可愛!小碩除咗跳舞叻之外,原來都有好歌喉,佢曾經上過台灣綜藝節目《SUPER STAR 我要當歌手 》表演唱歌,唱得都幾聽㗎。
鄧伊程(Tiffany)
Tiffany現時正修讀浸大學士學位,有一身高佻身材同健康膚色,一睇就知佢係運動健將!Tiffany中學時期已經係名校拔萃女書院的田徑健將,跳高、100米跨欄及接力等都有優異成積,喺學界田徑之中有「楊文蔚師妹」之稱,跳高、100米跨欄及接力等都應該難佢唔到,同時亦係一名游泳健將,真係十項全能。
羅詠怡(Kosa)
Kosa畢業於浸會大學視覺藝術系,佢嘅社交網站夠晒精彩,有唔少三點式泳衣照大晒身材,男網民們必follow!羅詠怡最爆係曾於講過自己拍過10幾次拖,只要熱戀期一過就主動分手,絕對稱得上戀愛女王呀!
李嘉豪(Alston)
Alston就讀於理工大學紡織及製衣學系,今年只係20歲,不過外表夠晒成熟,最爆係Alston喺節目中應主持要求即場剃鬚,仲係用麥明詩私人珍藏的剃鬚刀!
李寶君 (Suki)
節目中有對孖女,Suki係大孖。非常鍾意跳舞嘅佢,係一名半職業Dancer,除咗參與過農曆新年嘅花車巡遊,仲曾經擔當過鄭秀文演唱會伴舞之一,樣又靚,跳舞又勁,睇嚟可以全面邁向娛樂圈發展呀!
李寶珊
細孖同家姐Suki性格完全相反,不過兩姊妹感情非常好,家姐有演唱會表演,細孖都會去捧場同探班,以示支持。細孖冇家姐咁好動,不過佢可以話係「入得廚房,出得廳堂」,廚藝了得,又非常為食嘅佢,仲會不時親自下廚,甫上社交網站同大家分享。