袁偉豪張寶兒澄清不急於結婚 粉絲繼續撥行大葵扇

37歲的袁偉豪（Ben）與27歲的港姐女友張寶兒（Bowie）日前驚爆喜訊，有雜誌封面指男方已求婚成功，惟二人其後都否認其事，Bowie更在IG反問男友「你同邊個求咗婚」，公然耍花槍。很多網友催促Ben盡快完成人生大事；有粉絲指空穴來風未必無因，猜測二人好事近！

去年憑劇集《棟仁的時光》成為馬來西亞及新加坡雙料視帝，入行逾20年的袁偉豪，事業終於得到肯定，他與拍拖兩年多的張寶兒亦愛得如膠似漆。去年尾，Bowie與Ben、Ben母到日本外遊睇紅葉；今年農曆新年，二人又互相到訪對方家中拜年，令人覺得這對圈中情侶打風都打唔甩。

前日，有雜誌封面大字標題「Ben試探式求婚，張寶兒：『我跟你』」消息震驚香港娛樂圈。

Bowie被問造裙褂

然而，Ben對傳聞卻堅決否認已婚，他在IG幽自己一默︰「就嚟做咗人老竇都唔知，多謝各位關心！我還未結婚，仲未求婚，有消息再話畀大家知。」Ben身邊不少圈中好友包括黃翠如、周柏豪、林盛斌等也懶理婚訊真與假，先後留言送上祝福，Ben女友Bowie更忍不住在男友發帖下留言抽水︰「你究竟同邊個求咗婚，點解我唔知？」同時她亦於IG出Po，自言被人問及婚訊，更透露有人問她可有需要造裙褂，令她大感無奈。

Ben緬甸拍戲搵真銀

事實上，Ben在雜誌的訪問中，透露曾與女友談及婚事，Bowie回應︰「我跟，我跟你！」似有所暗示。Ben並坦言日後結婚有意在海外註冊，亦不排除突然閃婚，回港才作正式公布。他並指好友黃翠如已介紹很多海外註冊的地方，因此不少人估計很快聽到這對情侶的好消息。

很多網民睇好兩人有望開花結果；有人亦讚Ben與Bowie超登對，期待他們快快製造愛情結晶品。

另一方面，現時Ben已身在緬甸仰光拍攝電影《使徒行者︰諜影行動》，他昨晚特別於IG發布限時動態，分享在當地名勝的拍攝花絮，看來Ben已放鬆心情，重投工作懷抱搵老婆本。

撰文︰Steven、Pat

協力︰Terri、Jennie

編輯︰黃寶恩

美術︰梁政敏