葉德嫻（Deanie）為運輸署拍攝宣傳短片，獲網友瘋狂轉載，事關Deanie姐化身為「正義女俠」打擊交通工具乘客討厭行為，實在大快人心。網友讚Deanie姐在片中有霸氣之餘，笑笑口寸爆不守規矩人士，絕對係無得彈。其實71歲的Deanie姐一向都是超貼地的敢言女俠，鬧人鬧出形象來，Deanie姐原來有妙法, 她曾在訪問中說：「我鍾意做瑜伽倒立，大概做了10 年，所以我依家鬧人仲係好叻。我能做到，仲有邊個做唔到？」Deanie姐的經典語錄真係數都數唔晒，舉幾個例子畀大家重溫一下。
(運輸署YouTube短片截圖)
(運輸署YouTube短片截圖)
葉德嫻一向快人快語，對社會大小事都不平則鳴。(圖片：東星娛樂)
健康篇：
Deanie姐曾經是煙民，後來因健康問題而成功戒煙，更在公開場合開口叫關淑怡和許鞍華戒煙，2013年Deanie姐在紅館向台上的關淑怡送盆栽，並勸她說：「這盆花是有根的。這些根很好，代表你的聲線。你要繼續保持住好的根，要淋水，3天淋一次。你要運動、吃好點和戒煙，要聽我話！」直至去年電影首映禮上，Deanie當住一眾傳媒向導演許鞍華說：「唔知點解佢70歲咁犀利，佢只要戒煙的話，就可以拍多10年、8年的戲。」
葉德嫻跟許鞍華合作無間，最想好友戒煙保健康。(網上截圖)
子女篇：
跟子女情感疏離，Deanie接受電台訪問時提過：「可能我係有要求嘅人，我覺得我嘅要求唔係唔合理，能夠身為人，應該好好哋做，可能唔鍾意聽我話『你哋唔好hea』，唔鍾意、唔開心冇問題，呢個世界有孤兒、有死剩種，我唔介意做寡婦、死剩種，我唔介意絕子絕孫咁就得喇，你活你想活嘅生活。」
葉德嫻在《桃姐》中跟劉德華合作演的主僕情大為感動。(網上圖片)
選舉篇：
Deanie姐提醒公公婆婆不要被「蛇齋餅糭」所吸引而誤改選舉意向，她說：「我啲同輩阿婆呢，貪人一餐食，即係俾個餅你就投阿邊個。唔食嗰個餅你唔會死呀，年紀咁大囉，唔好留個案底先至走唔好咩？」而她每次都會鼓勵人站出來投票選賢能，她說：「呢個世界，蠢唔緊要，最緊要係唔好懶，如果你又蠢又懶，嗰啲係死症囉。你投一個你覺得最衰之中最好，但最低限度你要做。我覺得你一定要做。」
情歌篇：
葉德嫻說： 「世界難撈，現時消費者全部都是後生仔女，他們最喜歡聽失戀、你愛我、我愛你不到之類的歌曲，我一把年紀仍去唱這種歌，應該要去打靶啦。」
Deanie姐在演唱會上經常都有金句。(圖片：葉德嫻Facebook)
Deanie姐女俠的形象令人非常佩服。(圖片：東星娛樂)
革命篇：
2014年她走到金鐘支持雨傘革命的學生們，她說難以理解警方用催淚彈對付示威者後的態度：「我哋都係講廣東話，點解溝通唔到？」Deanie姐出言勸學生們和平、沈著氣，語重深長：「同一班小朋友講，要佢哋沉住氣，欲加之罪，何患之有，對方要扣你帽子，連麥當勞都唔畀食，話係外國勢力，要扣帽子就畀佢扣，千祈唔好嬲，堅持自己信念，雖然最後可能都爭取唔到啲乜，大吉利是！」