自轉「地球」來港 體驗太空俯瞰奧妙

相信大家都知道自己身處喺地球，但又有幾多人真係見過地球呢？黛安知道，市建局為響應3月藝術節嘅濃厚藝術氣氛，特意同幾個地產商合作，下個月開始會到利東街、荃新天地等地，展出著名英國藝術家Luke Jerram嘅全球巡迴作品「Gaia」，佢直徑長達7米，仲印有美國太空總署（NASA）1972年拍攝嘅超高清地球表面圖像，相當逼真，一於約埋成班朋友去同「地球」selfie喇！

黛安知道，「Gaia」大小係真實地球嘅180萬分之一，每厘米等於地球表面嘅18公里，企喺裝置211米以外欣賞，絕對可以模擬太空人從月球俯瞰地球、感受下嗰種震撼感！而呢個「地球」仲曾經喺英國、愛爾蘭、台灣等地展出，為慶祝首次來港，Luke今次仲特別為佢加入自轉效果，自轉一次需時4分鐘，比真正嘅地球自轉快360倍，等大家可以更生動立體感受地球嘅奧妙。

你都想親眼睇下「地球」英姿？咁就要注意以下時間，「Gaia」下月19日起，會到「利東街」、4月19日起就會轉到「荃新天地」巡迴展出。黛安已經約定成班姊妹去睇喇。