劉嘉玲冧稱︰我係梁朝偉最值錢珠寶

劉嘉玲昨日到中環出席珠寶展，穿上透視低胸服裝到場的她明艷照人，嘉玲說︰「我鍾意買珠寶，唔同階段鍾意唔同嘅嘢，最初鍾意白鑽，依家鍾意紅寶石。」嘉玲指老公梁朝偉亦會欣賞珠寶︰「佢識欣賞我就得啦，我係最值錢嘅珠寶。」

談到嘉玲的上海豪宅盡顯氣派，她說︰「上海間屋媽咪住緊，香港嗰間係我用嚟請客嘅，其他地方無物業啦，你哋成日講到我好似地主咁。」她表示自從懂得賺錢，便開始在香港置業，也有諗過海外置業，但明白力不到不為財，倘若出租期間遇上問題就好麻煩，買下來不住又浪費，還是買珠寶較實際。

早前嘉玲與偉仔到日本滑雪，不過偉仔已轉移陣地繼續到其他地方滑水、騎越野單車等，她笑言︰「唔使戴口罩吖嘛，不過都就嚟有人認得佢㗎喇，有啲健康嗜好都好嘅。」記者笑指暫代經理人的她容許旗下藝人放長假？嘉玲笑稱︰「離晒大譜，靠佢就慘啦，不過佢開心就得，佢搵緊自己嘅突破點。我明嘅，已經有90幾分嘅演員係好難再突破。」