堪稱為TVB神劇嘅《尋秦記》由首播至今雖然相隔18年，但人氣依然好勁，就算已經喺TVB重播2次都仲係咁受大家歡迎。所以男主角古天樂早已買好版權準備開拍電影版，將會搵返原班人馬林峯、宣萱喺今個月開拍。不過佢哋都唔夠江華咁受歡迎，飾演連晉、嫪毐嘅江華先係粉絲要求返嚟翻拍呼聲最高嘅演員。咁又係嘅，劇裡面嘅佢真係好可恨無情，一開始對主人巨鹿候忠心耿耿，點知被項少龍誤廢右手之後被逐出巨鹿候府，唯有去投靠其他人。途中佢遇到左手劍客嫪毐，經過一輪忍辱負重後終學成左手劍法，仲將真嘅嫪毐殺害，變成真正心狠心辣之人，讓人留低深刻印象。
雖則唔少人都仲可以數得出江華入行以嚟嘅角色、作品，但你哋又對現年56歲嘅江華本人認識幾多呢？
1. 唔明點解要翻拍《尋秦記》
江華就話唔明點解要翻拍：「唔好啦，全部都老嘢喇！不過老闆有呢個心願都好嘅。我覺得一部電視劇或者電影可以成日人哋心目中嘅經典已經好勁，唔需要再拍過。以演員角度睇，20年前同20年後今日仲要拍同一個角色，究竟想表達啲咩？但從商業角度睇，大家都咁鍾意，係有追看性嘅。」
(TVB電視截圖)
2. 屋企冇電視機
雖然江華係一個演員，不過原來佢唔多睇電視，全因屋企不嬲都冇擺電視機：「我其實屋企係冇電視機，不過我搬新屋嗰陣外父話『唔得，冇電視機點得㗎？』，於是就送咗部俾我！如果冇佢送，我係唔會買，係咪好奇怪呀？」
3. 相比起電視電影更鍾意研究人生
江華係就係鍾意做戲，不過佢話以前同張衞健拍《西遊記》扮唐三藏嗰陣，為咗入戲啲有特登睇佛偈參詳吓，結果人生價值觀都唔同晒：「喺戲裡面睇嘅嘢，冇外面嘅嘢咁精彩，因為人生好多嘢戲未必寫到」。依家轉咗信主，又淡出幕前，對於江華嚟講好多嘢已經冇所謂，活在當下，所以成日同人講道理，直頭好似個人生教練咁。
(TVB電視截圖)
4. 冇留戀過以前幾紅
江華係個好有演藝天份嘅演員，李大蝦、雍正、唐三藏、項羽、連晉全部都咁經典，好難定義巔峰，所以2013年之後冇再拍戲，觀眾粉絲都好唔捨得，覺得TVB欠佢一個視帝。不過江華就唔係咁睇：「有啲嘢留戀嚟冇用，人生係有好多頁，喺唔同階段可以做唔同階段嘅嘢，一切自有安排，過去咗就係過去，會繼續發生都會發生，所以使咩留戀咁多？」
(TVB電視截圖)
5. 唔鍾意俾人影相
江華喺1985年參加亞洲電視藝員訓練班正式入行，同黎明、張敏同屆，不過真正走紅就係過檔TVB之後嘅事。因為佢套《西遊記》創下44點嘅佳績，結果啲劇集都係搵佢做男主角。慢慢觀眾們發現佢無論神態、動作、樣、聲線都好似劉德華，靚仔又有型嘅外形都吸引唔少女粉絲鍾情。不過去到今日，江華竟然話自己其實唔鍾意俾人影相，只係鍾意幫老婆麥潔文影：「我從來唔覺得自己靚，我都唔係model，人哋model先有好多pose，好專業，我哋啲啲冇乜表情，點做到吖」，真係識講笑。
6. 同發哥嘅承諾
江華有次喺九龍城撞到周潤發：「你知發哥好隨和嘅，佢話：『點解你唔拍戲啫？』，我話：『有咩好拍啫？如果你開戲搵我我咪拍囉！』。走嗰陣發哥就話：『我第日有好嘢就搵你』，我話：『係喇，我等你㗎，我其實一路等緊你㗎發哥』，到依家我都冇放棄（做演員），我仲等緊。」。唔知發哥仲記唔記得呢件事呢？
7. 最怕同個女傾偈
以為江華係個大男人，好有爸爸嘅威嚴，點知佢話自己喺一個非常唔似爸爸嘅爸爸：「我好怕同個女傾偈，佢就係鍾意就睬吓你，唔鍾意就唔睬你，好似高竇貓咁。佢對我先係咁，佢對阿媽就好嗲，不過我知道佢知我錫佢嘅。」
8. 個樣360度冇死角？
好多人都話江華個樣係360度冇死角，就算低炒都好靚仔，佢就話自己真係冇分邊邊臉好睇啲，因為做演員一定唔可以介意呢啲嘢：「點解冇死角，係因為我唔計較，如果我叫導演淨係拍我左邊或者右邊臉，咁點可以演到好嘅戲？我拍戲就會將自己最好嘅狀態展露出嚟。」
9. 同老婆冇分好人醜人角色
江華同老婆麥潔文喺屋企冇分工，總之邊個得閒就邊個做家務；亦冇分醜人、好人，邊個教緊仔，另一個就唔好出聲：「我曾經試過我講嘅時候，佢又講，我代入咗我係個細路：『我究竟聽邊個講呢？』。」不過江華話佢係比較感性啲，老婆就理性啲，見到個仔做醫護人員好辛苦都唔會心痛。
10. 同個仔25年嘅誤會
原來江華同阿仔Bryan有個誤會係啱啱上個月先解開。事源Bryan接受我哋訪問嗰陣話覺得爸爸偏心妹妹，因為細個有次自己瞓著咗，點知爸爸帶妹妹去沙灘玩唔叫埋佢，之後佢睇返報導先知。但江華就話個仔完全誤解晒：「我有睇過嗰個報導，其實我唔會同個女去沙灘玩，係做專訪要帶埋個女啫！」