由方東昇主持嘅《長命百二歲II》今晚就播最後一集，相信好多觀眾都唔捨得，今晚過後就無得聽方東昇狂玩食字同爆金句啦！最後一集佢哋會去加拿大，探望移民當地嘅新聞界超級大前輩，當中有曾紅極一時嘅主播蘇凌峰。喺目預告一聽到蘇凌峰講：「現在由蘇凌峰為大家報道新聞。」嘅自我介紹，即時有種集體回憶嘅感覺！
（TVB電視截圖）
（TVB電視截圖）
蘇凌峰向大家展示的照片中，見到昔日主播的舊照，當中包括為人熟悉的陸嘉敏(前左一)、伍晃榮(後右一)（TVB電視截圖）
講到「蘇凌峰」三個字，年輕90後、00後可能會唔識，或者會將另一位有名嘅玄學家「蘇民峰」跟佢混淆。其實蘇凌峰來頭不小，紅霸80年代新聞界，稱得上係「新聞界第一代男神」。佢後生勁靚仔，又有觀眾緣，喺香港中文大學95年電話民意調查中，蘇凌峰就算離職5年，仍然穩佔「最受歡迎新聞報導員」三甲位置。當時市民仲幫佢改咗個花名，叫佢「明星蘇」，因為蘇凌峰唔係明星，但仲紅過明星，非常屈機！
(網上圖片)
蘇凌峰於1990年6月28日最後一次報導新聞，並於節目結束前，史無前例地喺熒光幕向全港觀眾道別，成為一時熱話。
(網上圖片)
蘇凌峰一開始並無打算從事新聞業。佢喺柏立基教育學院（今香港教育大學，教育學院前身）畢業後，做過一段時間老師，分別在元朗某小學同廣悅堂魯班學校任教。唔講唔知，連「臺灣國民歌王」周華健、漫畫家黎達榮、主持人阮小儀都係佢嘅學生！稱得上桃李滿門，就算蘇凌峰唔做新聞主播，相信喺教育界亦好有成就，會教岀唔少岀色學生呀！
(阮小儀IG圖片)
(周華健FB圖片)
做咗一排老師，為咗鍛煉口才，蘇凌峰報讀咗商業電台開辦嘅廣播訓練班，培訓完獲佳藝電視邀請試鏡，之後順利做埋新聞主播同記者。佳藝電視倒閉後，佢就轉投TVB新聞部，開始經常主持《六點半新聞報道》，又同拍檔李汶靜主持《星期二檔案》多年，之後成為TVB新聞部台柱，深受力捧，相信唔少香港人都係聽住佢把聲長大㗎！
(網上圖片)
後來就算蘇凌峰移民到加拿大，亦都一直心繫新聞業。佢加入咗多倫多CFMT電視台（OMNI前身），擔任粵語新聞主播同高級編輯。又曾經主持近60集人物專訪《真情對話》，專訪過香港大學校長徐立之等名人，唔少觀眾睇完節目都讚佢俱有敏銳觸覺，善於捕捉社會各式人物精彩背後故事。