《愛．回家之開心速遞》裡面清潔女工群姐Isabella（許思敏飾演）真是很出位，由茄哩啡變成不時向大小姐（林淑敏飾演）通風報信、告密的忠臣，愈來愈多鏡頭，可算是在接龍集團一個很重要的角色，令觀眾眼前一亮。戲中群姐有KC（歐瑞偉飾演）這個疑幻似真的「情人」，鏡頭下的許思敏感情世界又如何？今次許思敏首度剖白與老公結婚43年的甜蜜生活，大讚對方是個會照顧家頭細務的好男人；更加向大家公開與新抱、囝囝的私下生活，證明自己現實中並不如平時的角度般如此巴渣難纏，相反是個開通媽媽、奶奶。
(TVB電視截圖)
結婚43年情比金堅 好老公照顧家頭細務
自20幾30歲時結婚到現在，許思敏同老公感情都好好，她形容他們是老夫老妻，雖然已經不玩浪漫，沒有將甜言蜜語放在嘴邊，不過都會陪伴對方做喜歡的興趣：「我哋冇咩你愛我，我愛你呢啲嘢，我依家太忙啫，但平時我會同佢去旅行，兩個飲吓茶，兩個睇啲孫。我同佢仲會出街㗎，佢鍾意種花、養魚，我得閒就會同佢行吓旺角花墟，睇啲花同魚。」許思敏又甜絲絲地大讚老公種花技術好：「好靚㗎，我老公種嗰啲紫羅蘭，真係好靚㗎，可以去參展（蘭花展）咁濟啊！」
現在許思敏忙於拍攝《愛回家》，又要不時到屋邨唱歌籌款、登台表演唱粵劇，相反老公早已退休，所以平時會由老公在家主理家頭細務，是個廿四孝好男人。第一，老公知道她腳不好，會特意為了她煲靚老火湯：「有時佢會做咗我啲嘢。因為我腳有啲痛，聽人講飲花膠好嘛，佢就買咗啲花膠返屋企煲。佢自己都想飲，我又唔得閒煲，佢煲完就大家都有飲。佢唔識嘅話1次唔得，第2次唔得，第3次都得！佢特登去學。」第二，老公是個小男人，很會遷就、包容，所以二人才會相愛至今：「佢都係唔錯嘅，中國傳統都係大男人主義，但佢對我有包容、體諒，所以我好感激佢！」
公開同新抱、囝囝的私生活
至於面對囝囝、新抱，許思敏就好開通，對他們就如朋友一樣。許思敏話自己有3個仔，以前好靚仔曾經跟隨她到教育電視做童星。但時光飛逝，如今他們碩士畢業，3位都已經30幾、40幾歲，一個做保險，一個it管理層，一個酒店經理，平時上班都已經好忙沒時間見面，所以可以肯定不會入行做演員。平時囝囝經常開她玩笑，許思敏都一一接受：「佢哋以前睇完我啲戲會直接話：『你拍嘢唔得！』， 有人俾評價先有進步，依家佢就冇同我咁講喇」、「仲有佢哋好鍾意叫我做阿姐，之前係思敏姐，依家係群姐！」、「我好鍾意食肥叉燒、燒肉、雞皮，佢哋就會笑我食到變豬」。
「我個人好開心，啲仔有成就，佢哋個個又有樓、有仔女。」提起3個仔，許思敏一臉滿足。不過講到他們帶自己去日本旅行，許思敏就好抗拒：「啲仔仲帶我去日本沖繩自由行，但嗰次之後以後唔制喇。仔同埋老婆、個孫，一個family開心吓，跟埋個老嘢去，乜都要就我，我唔食呢啲、嗰啲佢又要就我，唔係幾好啦，入侵到人哋，所以我呢個媽咪都好開通㗎。」
許思敏平易近人，除了是個開通媽媽之外，還是個通情達理的奶奶：「我好樂觀，對新抱對囡咁，女就叫我媽咪。我會睇佢著衫好唔好睇，如果我想叫佢著長褲，唔好著短褲，唔會直接話佢，因為佢始終係仔嘅老婆。我會話：『啊，依家呢款唔興㗎喇，著另一啲好啲！』，咁佢哋就會聽我講。啲仔會叫我唔好講咁多嘢，唔好話老婆 所以我唔講喇，我可以話大家都冇我咁開通啊。」許思敏現實中同戲裡面根本是兩碼子的人，證明她演技果然一流。
(受訪者提供與授權)
(受訪者提供與授權)
(受訪者提供與授權)