著名甘草演員陳勉良喺電視劇中演活唔少綠葉角色，做道友角色維肖維妙，仲因為咁被封為「TVB御用道友王」。戲外你哋又知唔知佢真實身份？其實陳勉良一啲都唔簡單，佢係師承嶺南畫派嘅國畫大師，於藝術上有深厚嘅造詣，最近仲喺中環舉行從藝半世紀回顧——「墨靈青丘」個人畫展！
(圖片來源：香港電台節目《香港故事-職外高人：畫藝人生》截圖)
陳勉良17歲開始跟隨畫家何百里學習，不斷積累經驗，最擅長繪畫山水畫同自然寫生，70年代初已經開始喺社區中心教畫畫同演出話劇。佢拎過香港公開畫賽首席獎、亞太區中國水墨畫入選獎等多個獎項，實力絕對受藝術界肯定，米雪同李香琴都係佢徒弟。從事藝術創作50幾年，陳勉良已舉辦過10多次個人畫展，之前仲結集自己作品成為《勉良近作集》出版！
(圖片來源：陳勉良網上畫廊)
(圖片來源：香港電台節目《香港故事-職外高人：畫藝人生》截圖)
而TVB監製導演知道佢畫畫功力深厚，有時凌晨兩三點，美術部已經收咗工，導演亦特地請佢幫手畫道具畫。就算要捱夜，陳勉良亦完全唔介意，好有義氣咁話：「都捱慣㗎啦，幫手畫幾筆啫！」
(圖片來源：香港電台節目《香港故事-職外高人：畫藝人生》截圖)
(圖片來源：陳勉良網上畫廊)
陳勉良醉心畫畫，不過喺香港做藝術創作難免會比人覺得無前途，幸好兩任太太都無條件支持佢創作，令佢無所顧慮。特別係第一任太太，陪伴咗陳勉良25年，共渡過唔少患難，喺陳勉良最窮嘅時間，佢都願意下嫁。陳勉良直言第一任太太係佢人生同藝術路上嘅重要支柱：「佢從唔介意我貧富，我畫畫佢總係好鼓勵支持我。」
(圖片來源：香港電台節目《香港故事-職外高人：畫藝人生》截圖)
(圖片來源：香港電台節目《香港故事-職外高人：畫藝人生》截圖)
可惜天意弄人，第一任太太後來因病離世，令呢對甜蜜夫婦天人相隔，陳勉良因此情緒崩潰，幾乎放棄國畫：「佢過身時，我大病咗一場，有段日子停落嚟無畫畫。後來我諗：『太太一生都為我付出、犧牲，我更加唔可以放棄，一定要努力畫畫。』」諗到第一任太太嘅付出，陳勉良再次鼓起拼勁，努力創作，後來遇上現任太太，同樣好支持佢，二人雖無所岀，但生活平靜幸福，眼見陳勉良走岀低潮，事業家庭都好美滿，實在為佢高興！
(圖片來源：香港電台節目《香港故事-職外高人：畫藝人生》截圖)