張衞健早前為《大帥哥》嘔心瀝血拍足半年，終於憑劇集強勢回歸香港幕前，人氣再度急升，但他卻明言已經看淡名利，暫時都不會拍劇。身為一名很喜歡演戲的藝人，為家人減少產量是個不容易的決定，但對於在家是個孝順仔、在婚姻是個寵妻好老公的張衞健來說，風光背後經歷過老婆張茜流產、弟弟離世、媽媽溺水險死等打擊，令他領悟到人生在世還是家人最重要，所以寧願抽多點時間、放慢腳步陪伴媽媽、老婆。日前他接受商台節目訪問，大談入行多年如何擊破事業上的低潮與挑戰，分享從中學到甚麼，更加會深入分享自己面對人生最痛時的態度。
17歲輟學放棄夢想 為養家交租連食飯錢都冇
張衞健前半生演了多部經典喜劇，給人印象是幽默風趣，殊不知他的童年卻是十分悽慘的。他出生於九龍紅磡蕪湖街的唐樓，由於家庭經濟拮据，他17歲就出外工作養家，供弟弟在海外讀書。由於張衞健天生擁有一把好嗓子，又喜歡唱歌，在樓下餐廳的琴師邀請下 ，17歲就到酒廊唱歌賺錢。不過張衞健話即使自己喜歡唱歌，壓力也是非常大：「Form 6嘅同學仔仲喺度研究打邊隻機，邊隻波鞋抵嗰陣，我就要擔起養家嘅責任。對於17歲嘅我嚟講要養成家人，責任何其大，已經唔得閒諗自己壓力有幾大，只係諗如何交租、如何俾細佬學費、如何食飯。」後來張衞健開始厭倦做酒廊歌手的生活，渴望離開那些環境，想養家之餘都做到自己喜歡做的事，於是好積極參加歌唱比賽。頭幾次張衞健都失敗，但他沒有放棄，好勤力地練歌練舞：「第1次唔得就第2次，第2次唔得就第3次」2年後，張衞健於TVB及華星唱片合辦的第3屆新秀歌唱大賽，終於成功贏到金獎和最突出台風獎，順理成章入行做歌手。
(TVB電視截圖)
可惜娛樂圈的真實生活把張衞健的幻想粉碎，入行8年間他的音樂路都高不成低不就，電視台薪金只夠交租，就連午飯錢都沒有。「我以為攞到冠軍，唱片合約，咁就已經搞掂，但識得你，同鍾唔鍾意你，支唔支持你係兩回事，呢步我行咗8年。最冇路可行應該係我25、26歲時候仲喺電視台做緊可有可無角色嘅時候，人工好低，每個月大概3500蚊。我全家人住緊嗰間屋，租金已經啱啱好3500蚊，我仲要搵學費、燈油費、水電煤費返嚟。返到去電視台，人哋放lunch，我係冇錢食飯...作為一個演員，做到我連碟頭飯都買唔起咁都幾失敗。喺圈度做唔出成積，基本生活都過唔到...」
雖然身為家中唯一經濟支柱的生活很困苦，但張衞健依然好努力，他覺得家人有屋住、有飯開、有學返，自己可能將事業變成興趣已經好好：「我持半杯水嘅態度，只係差少少之嘛，仲係everything's all right。交到租、交到學費、交到燈油、水電煤，就係差個碟頭飯，嗰度差幾多吖？我應該感恩，我好幸福。比起其他人，我每日做緊嘅嘢係我好熱愛嘅嘢已經好幸福㗎喇！」即使面對難關，張衞健都好積極正面，沒有自怨自艾。來到今日，張衞健終苦盡甘來，成為很多年輕演員很敬佩、學習的前輩。
(TVB《老友鬼鬼》截圖)
(TVB《老友鬼鬼》截圖)
親父出軌拋棄全家 最擔心媽媽捱不住
其實張衞健之所以成為唯一經濟支柱，年紀輕輕就要負上養起全家的責任，全因當船員的爸爸。本來他的父親已經有暴力傾向，經常喝完酒之後對張衛健和母親拳打腳踢，有次甚至把弟弟屁股打到皮開肉裂，最後還將慘狀拍下來，好似收集戰利品般，為張衞健留下了難以磨滅的陰影：「有一次佢忽然將我壓喺床上，差啲窒息」。張衞健於大陸節目《我是演說家》中更加自爆他曾親眼目睹父親出軌，當時他只想保護母親，怕她接受不了：「我細個喺屋企好秘密嘅角落發現我爸爸攬住第二個女人嘅照片，於是我偷咗呢啲相放入垃圾袋，收埋喺我小學嘅廁所度。」，
對此張衞健表示，人生當中許多事情已然發生，最終都會有必然的結局，而在此過程當中，如果可以做到盡量去減少對身邊人的傷害，那麽選擇不揭穿某些事情也是對親人的一種保護。有些時候，知道太多不該知道的事反而會加重人生的負擔，所以張衞健媽媽至今都不知道這件事。
去到張衞健15歲時，父親拋妻棄子，母子二人租房度日，為免媽媽要母兼父職太辛苦，他在17歲毅然輟學，放棄讀法律的夢想，擔起養家責任，睇得出他很愛媽媽。張衞健也提到自己與媽媽好似朋友一樣，感情好好，所以即使入行後好忙都好錫她：「我阿媽對於我哋幾兄弟由細到大都好free，唔會好強制性地要做乜做乜，只係不斷remind我哋唔好做乜。」可是媽媽於2013不幸發生意外，在杭州拍劇的張衞健當下晴天霹靂：「電話打嚟話我媽咪昏迷咗，冇心跳，冇脈搏，冇呼吸，入咗ICU。醫生同我講做冷凍治療，有啲人醒得返，有啲人醒唔返，嗰陣我打定輸數，因為太大年紀，都70幾歲。」幸而最後請了神父到醫院為母親祈禱，2小時後媽媽竟然奇跡地蘇醒。現在張衞健不時會跟媽媽行街、游水，艱苦過後終於可以盡享母子天倫樂。