37歲朱慧敏（Queenie）曾經係無綫御用「邪牌」，大婆剋星形象可以話係深入民心到大家都幾乎唔記得佢係2004年度香港小姐競選亞軍。終於2014年於《愛·回家》演律師先至入屋洗底。但其實現實中嘅佢讀名校，最多放學喺學校排話劇，從來唔去夜街，初時根本唔敢入娛樂圈，係名副其實嘅乖乖女，同螢幕上嘅佢截然不同。
{{hket:inline-image name="1498910943_0068.jpg"}}{{/hket:inline-image}}
做「壞女人」入型入格！（電視劇《珠光寶氣》截圖 ）
婆婆及媽媽相繼離世
Queenie父母離異，自小就由婆婆一手湊大，兩婆孫感情深厚。婆婆患病時Queenie只有十六歲，仲記得自己成日放學着住校服去醫院探婆婆，到後來，婆婆再撐唔住，Queenie親眼望住護士幫婆婆掹喉。Queenie形容當時係佢一生人中最深刻一幕，亦係佢人生中第一次有咁親嘅人離世，Queenie當時喊到幾乎暈低。
{{hket:inline-image name="ETA897_017_002.jpg"}}{{/hket:inline-image}}
同婆婆感情深厚。
之後Queenie就由媽媽「接管」，媽媽嘅管教方式同婆婆好唔同，教佢唔好咁易相信人，甚至希望Queenie輟學入娛樂圈，見識多啲、學壞啲。Queenie嘅媽媽係喺佢當年選港姐時發現罹患乳癌，但媽媽怕影響佢參賽表現，刻意唔同Queenie講：「到我發現佢患癌嘅時候，已經係末期。」提起時Queenie仍然眼濕濕。之後Queenie都有陪媽媽去化療，過程中媽媽冇流過一滴眼淚，仲笑笑吓，最後媽媽未嚟得切見證佢卸任港姐已經離世。
{{hket:inline-image name="10299611_1426337650954606_1995485803_n.jpg"}}{{/hket:inline-image}}
Queenie喺自己社交網Post相悼念媽咪。（圖片：朱慧敏 ig）
得知遺傳BRCA基因突變積極生活
婆婆63歲、媽媽同阿姨都係48歲相繼因為乳癌離世，因此Queenie 24歲時接受檢查，驗出帶有BRCA基因突變，即患上乳癌或卵巢癌的機會比一般人高。生命中兩個咁重要、咁特別嘅人離佢而去，仲要發現自己都有BRCA基因突變，多重打擊下Queenie並冇消極。Queenie由檢查一刻開始已有心理準備，以平常心面對，佢認為唔需要擔憂同恐懼，最緊要有正向信念、注意身心健康同定期檢查。Queenie呢十幾年戒食紅肉同含激素嘅食物，例如燕窩、雪蛤膏都唔會食。茹素之後，Queenie甚至有「逆生長」情況，感覺愈嚟愈年輕青春。
決不「將貨就價」
Queenie嘅情路亦同樣崎嶇，同彭懷安（Eddie）嘅感情拖拉多年，早前更直斥男方「謊話連篇」，終於怒斬情絲。不過佢依然相信愛情：「我好鍾意談戀愛，我好想結婚，因為件褂好靚，成日都想試着。」Queenie自爆現時不乏追求者，但佢嘅擇偶條件係要思想正向，即使渴望結婚，佢亦絕對唔會降低要求！
朱慧敏與彭懷安曾有結婚打算，但因男方「偷食」臨門撻Q。
憧憬孕育下一代
帶有BRCA基因突變亦冇打消Queenie生兒育女嘅念頭：「可能將來仔女遺傳爸爸！」除咗BRCA基因突變之外，媽媽樂天知命嘅性格都一樣遺傳咗畀佢。Queenie好感激媽媽將自己帶嚟世界：「媽媽喺我心目中好叻、好靚，是個心地善良的女強人，我能夠遺傳到她的一切，係最好嘅禮物，我覺得自己都好似媽媽一樣咁鍾意笑。」