「食屎陳師奶」為養家身兼三職 單親媽媽與兒孫天各一方

孫慧蓮，又名食屎陳師奶，在《愛．回家之開心速遞》中雖然是個有夫之婦，不過常常與根叔（劉丹飾演）非常曖昧，關係糾纏不清，惹人大笑。鏡頭之外，孫慧蓮是個育有3個女兒、4名孫兒的單親媽媽。回想從前，孫慧蓮母兼父職，要一個人獨力照顧3個女，都別說不辛苦。不過為了家庭，她甘願花上半生打3份工賺錢養家，等到下半生女兒可以照顧自己，頭髮都變得斑白時才勇於追尋夢想。雖然可以一嘗做演員的心願很感恩，但講到2個長居美國的女兒時，她不禁哽咽：「養兒一百歲，長憂九十九，好掛住佢哋」。

{{hket:inline-image name="11.jpg"}}{{/hket:inline-image}}

單親媽為養家身兼三職 

「食屎陳師奶」孫慧蓮（Helen）是個單親媽媽，一個小小的婦人唯有做3份工湊大3個女，包括在小學做訓導老師、教人補習、教編織與烹調，供3個女兒在英國讀書，幸好她們都好生性、用心讀書，不用媽媽擔心。後來大女兒覺得英國生活好沉悶，雖然美國無親戚，但憑一己之力考獎學金到美國留學；而二女就從英國考回香港大學，讀書成績好好，如今仍會照顧媽媽孫慧蓮；至於細女都去美國，由大女照顧。如今2個女兒已成家立室，生活安定，孫慧蓮都話好欣慰：「3個女事業心好重，見到佢哋算係終於成材都好開心，唔係社會敗類。」

見到女兒可以照顧自己，孫慧蓮終於放心追尋夢想：「我從小夢想做演員，係第二個夢想，雖然冇受演藝訓練，不過都好想試吓！」去到1996年，未退休的孫慧蓮在港台做兼職，一次偶爾見到有藝員招聘通告，於是膽粗粗見工。去到面試場地，在好大個禮堂中間有3位面試官，除了孫慧蓮之外，其他都是星爸、星媽、星二代，令她老人家甚有壓力。不過既然一場來到，孫慧蓮都想試試，恰巧面試內容叫她扮演老師，她就重演一次當年做訓導老師教人的模樣：「面試只有我一個老人家真係覺得無地自容，不過佢哋好尊重我，有長者劇本，我個性又好堅持，所以就冇走到。佢叫我扮訓導主任，我心諗啱晒我，我之前都係做老師，我扮緊嗰陣當咗啲面試官係學生，同佢哋講人生在世對讀書冇興趣冇所謂，做人最重要係品格，就算掃街、送外賣都係正職。我都曾經考到護士，唔會認輸。結果我就面試成功咗，入咗行。」

{{hket:inline-image name="14.jpg"}}{{/hket:inline-image}}

(受訪者提供及授權)

美國兒孫滿堂 仍堅拒移民？

現在孫慧蓮靠食屎陳師奶彈起，工作比之前更忙，其實對她來說，只要可以入行做演員，就算做茄哩啡做足23年都已經好感恩。雖然很喜歡留在香港繼續追夢，不過孫慧蓮言語中還是很掛念3個女兒：「依家我好自由，香港照顧老人家嘅福利都幾好，好鍾意香港，生於斯，長於斯，死於斯。神帶領二女返嚟照顧我，我喺呢度又有朋友、有得拍戲好開心，唔想犧牲自己快樂同理想，所以冇移民美國。」另外孫慧蓮又好掛住大女、細女，即使不會移民，亦會不時飛去美國探望她們：「雖然佢哋依家都好大個，生活得好好，屋又好大，不過梗係掛住佢哋，始終養兒一百歲，長憂九十九。因為我2個女都喺美國，我會去探佢哋，呢度住2個禮拜，嗰度住2個禮拜，我唔想住成個月會好掛住佢哋，同埋唔想煩到佢哋，連被都會帶埋過去，唔使佢哋特登為我洗。」明明心繫香港，決定繼續追夢，卻時時刻刻念掛著女兒，處處為她們設想，坦白講孫慧蓮真是個好媽媽。

{{hket:inline-image name="12.jpg"}}{{/hket:inline-image}}

(TVB電視截圖)

{{hket:inline-image name="13.jpg"}}{{/hket:inline-image}}

(TVB電視截圖)