又一城Taste科技風 機械「員工」與客互動

科技日新月異，連超級市場都要緊貼潮流。黛安知道，最近九龍塘又一城嘅Taste旗艦店重新開幕，仲帶嚟咗唔少創新嘅零售科技，好似有識得同大家對話嘅「機械人實習生」、幫手預訂貨品嘅「訂購易」、仲有多部自助收銀機等，以後行超市掃貨，就愈來愈方便喇！

又一城嘅Taste旗艦店經投資4,500萬全面裝修後，終於喺本月1號重新開張，仲加入唔少新元素，除咗有更多健康同新鮮食品外，裝修無論顏色、貨架設計都令人眼前一亮，空間感大增，令人行得好舒服。

黛安親身去參觀過，仲同百佳超級市場董事總經理任良安（Norman）傾咗一陣，佢同黛安分享，除咗外觀外，店內因應市場需求，亦引入唔少新科技，好似有用咗6位數字投資嘅機械人實習生Pepper，可以因應客人唔同問題作回應，如可以話你知最近有咩精選優惠、商場有無免費泊車等，成為全港首間引入機械人「員工」嘅連鎖超市！

「訂購易」與自助收銀 購物更方便

Norman話，現時Pepper仲係喺實驗階段，以又一城旗艦店作為首個試點，估計2至3個月後再逐步推行至其他人流較多嘅分店，分擔前綫同事嘅工作，亦帶畀客人創新體驗。旗艦店另一亮點係3部幫手預訂貨物嘅「訂購易」，客人可以揀定想買嘅心水貨品，2個鐘後再返嚟一次過拎貨，方便唔少趕住睇戲食飯嘅客人，聽講嚟緊仲計劃逐步延伸至大概50間分店，兼研發訂購易手機App，等顧客喺手機都買到！

至於舊年初起試行嘅自助收銀機，Norman話大家接受程度高，依家已逾90間分店有。其他生活化零售科技，仲包括美食預購App「TasteToGo」、電子價錢牌等。Norman話科技同數碼化係現今大趨勢，百佳嚟緊都會繼續推出新科技，優化顧客嘅超市購物體驗！