《愛回家》群姐誓不退休 許思敏自認是愛蒲飛女

《愛．回家之開心速遞》最新一集又有群姐Isabella（許思敏飾演）搞笑演出！故事講述KC（歐瑞偉飾演）代表大房與二房爭奪與葡萄牙發展商合作的計劃，幸得二房的Icy（岑杏賢飾演）暗中趕來幫忙，最終洽談成功。為報答失戀Icy，KC請群姐幫忙介紹對象，怎料群姐牟取暴利，表示要加錢才會幫手。KC答應，並偷偷地計劃走火警時讓Icy扭傷，被鐵面陳（王致狄飾演）抱落樓。最後被公主抱的人竟然變成群姐，群姐仲意猶未盡，收錢又食仔，認真蠱惑。其實群姐真人叫做許思敏，關於她，可能大家只知道她是ETV教育電視的御用媽媽，但私下生活習慣就未必清楚。今次就由許思敏向大家分享她4個秘密！

{{hket:inline-image name="11.jpg"}}{{/hket:inline-image}}

(TVB電視截圖)

{{hket:inline-image name="13.jpg"}}{{/hket:inline-image}}

(TVB電視截圖)

{{hket:inline-image name="14.jpg"}}{{/hket:inline-image}}

(TVB電視截圖)

1. 拍西片做過群姐講流利英文

許思敏話自己有拍過幾套外國作品，一套是《Goodbye Hong Kong》飾演住在唐樓的媽媽；一套是1990年的懸疑片《Yellowthread Street 黃線街》，由影帝Bruce MacLeish Dern做主角，而她就飾演清潔姐姐，難怪做起群姐時如此突出：「我拍過幾套西片，嗰時1997年有好多外國人嚟香港拍，覺得香港好神秘。我覺得佢哋拍得好細膩，例如我同個主角有對手戲，雖然影唔到佢，淨係影我，但個外國演員照會做反應俾我接...係呢2套我最印象深刻。」多得拍西片的經驗，天生語言天份高的許思敏馬上就學會了英文，所以即使只有中學教育程度都講得一口流利英文。

2. 貪靚師奶為上鏡勤力打扮

許思敏話自己最貪靚，對頭髮有特別護理：「我有好多捲髮器，嗰個年代已經要$450，依家已經用到第4個。我朝早一早起身就插咗個卷髮器預熱先，之後去擦牙洗臉，到佢夠熱就捲，跟住化妝執返啲眼耳口鼻，前後最快半個鐘就出到門口。我日日捲仲快過人哋啲髮型師，熟晒手。」另外大家見到如今一頭啡紅色頭髮，原來是許思敏自己染：「呢個年紀有好多白頭髮，但10幾20年都係我自己染頭髮。因為有次我去染頭髮染到好似假髮咁，呃我成千蚊，後來去TVB拍嘢有個髮型師教我買漂粉溝色，依家好多人都話我個髮色靚。」

除此之外，許思敏出鏡的衣服，無論是黃色群姐工作服，還是換上登台衫，全都是她自己私伙嘢：「我好鍾意shopping，屋企好多衫，有啲衫就係拍電影做師奶著、有唱歌衫、有闊太衫、有平時出街著...一屋都係衫，搞到俾老公投訴：『我間屋就嚟變你嘅fitting room喇。』，我會特登揀闊啲，遮住我個肚腩。我仲有好多高踭鞋，襯唔同褲！」

對於自己塊臉，未入行前在尖沙咀做高級時裝、化妝品公司sales的許思敏更加大手筆，自爆用貴價護膚品保養：「呢10年、8年，我唔化妝唔會落街㗎，平時我都會買好貴嘢，用成$2000、$3000嘅嘢搽面 。」

{{hket:inline-image name="15.jpg"}}{{/hket:inline-image}}

 3. 自認是愛蒲飛女

許思敏最後仲自爆是個潮媽，思想開放：「你叫我去disco玩，我依家都可以，我去跳吓un吓都得，反而我啲仔、新抱就唔會去，我仲潮過佢哋哈哈哈。嗰時拍完西片，啲鬼佬好鍾意去酒吧開party叫埋我哋去，佢話我係naughty mother！嗰時我讀書，人哋話我係飛女。」直至現在，許思敏都很喜歡出街玩，無時停，搞到被4個孫投訴：「佢話同我講話：『嫲嫲你唔好咁忙，你要陪吓我哋㗎嘛，我應承你同我飲茶，唔好唱歌拍嘢。』，所以我依家每日會同佢哋facetime幾分鐘。」

4. 酷愛拍戲 永不言休

許思敏話，自己最愛工作，因為快樂不知時日過，有得做更加快樂：「我唔會退休㗎，你叫我坐喺度唔做嘢，我會對住四幅牆胡思亂想，會諗唔開心嘢。好似以前啲仔要見家長，有啲唔開心，一做嘢就忘記晒，投入工作度，會好開心。同埋忙可以填滿個腦，唔會空白，有得做先開心。有次有個阿姐見到我抺嘢，佢問我辛唔辛苦，我話：『唔辛苦，做人要敬業樂業，唔好諗搵得多定少，同啲客人傾2句，日子好快過。』，阿姐就讚我可以做人生教練，嗰次我先知我可以導人開心。