其實娛樂圈有唔少藝人都係出身神科，好多仲係高才生，以好好成績畢業，不過佢哋興趣始終係演戲，所以紛紛加入娛樂圈做演員。
呂慧儀
呂慧儀係個聰明人，除咗從細到大都好叻計數之外，好勝心都使佢努力讀書：「大家都係花一樣學費，點解你有獎學金，我冇？冇理由你得我唔得......我最叻數學同physics ，中7仲讀pure maths！ 」結果呂慧儀中7嗰陣勁到理科全級第1，打低晒所有同學；去到會考連最怕讀嘅中國語文及文化科都攞A，高考中文亦奪得A級成績。雖然文、理科都咁厲害，不過呂慧儀都係鍾意數學，所以入咗香港科技大學電子工程系，據悉學系要求數學、英文水平高，證明佢好叻女。有次呂慧儀仲話屋企啲電器壞咗會自己修理：「 最鍾意研究電腦板，屋企嘅門鐘係我自己設計，當年功課之一用到今時今日。燈膽壞咗、 燒fuse 、 家庭電器 ， 全部都識整 …… 」，甚至返過母校做代課。
胡杏兒
胡杏兒中學本來就讀傳統名校聖母玫瑰書院，之後佢被送往北愛爾蘭貝爾法斯特循道中學留學。喺北愛爾蘭完成中學課程後返番香港，完成會考就獲得香港科技大學取錄，攻讀生物化學系。只係去到1999年嗰陣，佢決定陪朋友參選香港小姐，最終以19歲之齡獲得香港小姐季軍同活力風采獎，成雙料香港小姐，最後決定休學簽約TVB。
雨僑
雨僑媽媽為一位小學教師，由細到大都有人貼身教授，所以去到中學就讀於名校英華女學校。2002年，雨僑喺會考攞到26分，最後修讀香港大學生物系，並考獲八級鋼琴證書，係個傳統優異生履歷。雨僑都自認係個叻女，不過因為想去娛樂圈闖闖，見識世界，所以揀咗做演員：「就算囂張都要講，香港嘅女生的確好叻，叻唔止係學歷，而係佢哋認為擔起一頭家無問題，亦都好願意去承擔。」
張曼玉
張曼玉8歲嗰陣全家移民咗去英國肯特郡，童年同青少年時期都喺英格蘭度過，曾經喺肯特郡讀中學。後來17歲回流香港，雖然冇大學學位，不過喺2011年嘅時候，英國知名學府嘅愛丁堡大學為咗表揚佢喺演藝圈嘅傑出成就，特登頒發榮譽博士學位俾佢。
李嘉欣
李嘉欣喺澳門出世，父親Francis Reis係葡萄牙人，母親係上海人，佢中學嗰陣喺瑪利諾修院學校就讀，會考取得2A、7B佳績，其中英文同聖經勁到攞A。不過佢放榜收到呢個成績竟然喊咗出嚟，因為喺佢間名校嚟講呢個結果算係差。咁多年嚟佢學識多國語言，例如廣東話、上海話、英語、日語、葡萄牙語、意大利語，當中日語就拎到1級能力證書，據悉佢喺2009年修讀英語碩士課程並畢業。
郭藹明
郭藹明曾經就讀名校嘉諾撒聖心書院，後來遠赴美國南加州大學修讀機械工程學。1991年，佢以碩士生身份參選香港小姐競選，一舉拎到冠軍、國際親善小姐同最佳談吐幽默獎。有指郭藹明曾經喺美國太空總署(NASA)做兼職見習工程師，不過郭藹明接受訪問時公開否認傳言，話自己只係喺私人航天業公司實習。
郭羨妮
郭羨妮細個係喺天神嘉諾撒學校及嘉諾撒聖瑪利書院畢業，之後就去咗加拿大讀西門菲莎大學，修讀心理學同經濟學，擁有雙學位資格。畢業後佢投考加入國泰航空有限公司任機艙服務員。
黃翠如
黃翠如曾就讀基督教香港信義會馬鞍山信義學校，會考獲25分（1A5B)，2000年預科畢業於五旬節林漢光中學。後來入咗香港浸會大學傳理學院公關及廣告系，曾於廣告公司做客戶服務嘅暑期工作，不過同年被余詠珊選中而加入有線電視，後來再轉投TVB。
麥明詩
麥明詩喺澳洲出世，之後返番香港，曾就讀於拔萃女小學、拔萃女書院同英國Wellington College。除咗自幼學習芭蕾舞、排球，聲樂達到八級之外，佢仲打敗過2000名參加者，前赴美國阿拉巴馬州太空訓練營加入「小太空人訓練計劃」。2009年，她喺會考中國語文科同英國語文科考獲最高的5*級、以及8科A級的十優佳績，為當屆10優狀元。結果佢成功於劍橋大學紐納姆學院法律系畢業，仲通過咗美國紐約州律師考試。
孫耀威
孫耀威自小成績優異，曾就讀聖嘉祿學校，喺會考奪得5A1C共28分嘅佳績，係該屆沙田官立中學理科班狀元，中六之後孫耀威就同森美畢業於喇沙書院。後來佢入讀香港中文大學逸夫書院電腦科學及工程系，副修法文，同森美被稱為「中大雙雄」。
岑杏賢
岑杏賢10歲就已經去到海外讀書，早年就讀位於英國嘅西敏公學，之後喺倫敦布魯內爾大學完成心理學學士學位。去到2014年，岑杏賢再於香港理工大學諮商與輔導文學碩士課程畢業。現時係職道生涯規劃輔導協會嘅心理輔導師，所以除咗演戲，佢仲有建立個人網上直播節目 《心理急救室》幫網民輔導。
黃心穎
黃心穎喺美國紐約出世，先後就讀Dr. Annie B. Jamieson Elementary school同Eric Hamber Secondary School。2012年，佢於加拿大英屬哥倫比亞大學金融與國際商業碩士畢業。