大陸由官方到民間都唱好「中國第一運動」──大媽廣場舞，有城市婦女說，廣場舞是減壓良方；亦有農村留守大媽說，是排解寂寞的好方法。可是自從新移民愈來愈多，近年大媽都開始殺入香港屋邨，於凌晨時分或者天未光就會聞歌起舞。不少居民投訴嘈吵的大陸背景音樂如同音波功，令人難以入睡，非常擾民。即使有居民勸阻，甚至斥罵她們很自私，她們都不為所動。於是《東張西望》又再出動，派攝製隊實地採訪，發現大媽竟然亂收錢，問題嚴重。網民大讚《東張西望》做到嘢，而記者李旻芳更加厲害，繼早前親自到石硤尾白田邨麗水樓，死忍臭味貼身採訪倒屎狂徒後，今次同樣無懼大媽，大膽上前希望走進她們的內心世界。
(TVB電視截圖)
大媽侵襲土瓜灣 魔音吵耳勁擾民
勁歌熱舞，夜夜笙歌，有廣場的地方就有大媽跳舞，之前有大媽就踩入港珠澳大橋香港口岸，在空地上同partner大跳社交舞，非常忘我。近日大媽更加侵佔公屋空地舉行「舞」林大會，以舞會友，居民話土瓜灣體育館對出空地最誇張，每次有過百個大媽，場面盛大。除了大陸音樂，原來她們還有一位專業導師戴著咪高峰，用擴音器親身開班授徒，教大家逐步跟著拍子、動作跳，雖然她講廣東話，但就充滿濃烈的大陸口音。整齊的舞姿，強勁的音樂，個個大媽都跳得有板有眼，似乎下了不少苦功。
原本跳舞是一件有益身心、舒展筋骨的活動，不過記者李旻芳去到現場之後發現，即使站於100米範圍外都依然聽到音樂聲、導師把聲、非常響亮。跳舞年資達18年，將廣場舞引入香港的導師就解釋：「因為跳舞有個動感一定要有音樂啊嘛，音樂唔大聲，聽唔到音樂就會跳唔起咁樣，冇感覺，係種習慣，但又唔會太大聲...」跳舞要有感覺，音樂愈播愈大聲，大媽愈霸愈多地方，足足佔了半條行人通道，經過的街坊都要繞路走避開她們，連散步、休息、玩康樂活動的空間都沒有。
(TVB電視截圖)
(TVB電視截圖)
(TVB電視截圖)
長期佔領公眾地方 違法收錢賺到笑
原本以為音樂大聲擾民、長期霸佔公眾地方已經夠誇張，怎料加入廣場舞原來要有條件。代名周太的受訪者就經過聲音處理向李旻芳爆料：「初初我見到跳民族歌幾得意喎啲動作，伸吓手嗰啲，諗住嚟跳吓，點知佢話要收錢。」為何香港要打波要租場地，大媽就可以話霸佔就霸佔？公眾地方人人都有權使用，為何要付費才可以跳舞？為何有人私自把這裡變成商業地方？為了揭開真相，攝製隊安排工作人員混入群中。直至落堂想了解情況，僅同坐在旁邊的大媽談了幾句，對方就主動提出要收錢。工作人員問：「呢度係長期問康文署租㗎？」，大媽就話：「冇租㗎，冇租㗎，冇租㗎...因為呢度係公園，老師都唔係收學費，老師係收充電錢...啫係有啲費用啫。」
最後發現該位大媽其實是跳舞團隊的管家，負責向學徒定期收取學費。她們1個月收港幣40元，最少必先收足3個月，即120元才可加入跳舞團。平均每晚有60、70個大媽跳舞，每人每季收120元，連場租錢都省掉，導師可淨賺8400元，變相無本生利。導師解釋：「因為老師要備課、擴音機充電，有時會壞又要買，佢哋（學徒）都好願意俾錢，因為應該嘅。由10幾、20幾，到依家80幾個人嚟學。」元旦過後，導師又再坐地起價，每人多收30元，總共150元，並要求費用放在利是，交予導師，務求神不知，鬼不覺。
(TVB電視截圖)
(TVB電視截圖)
《東張西望》轉達港人聲音 康文署終回應
這群大媽霸佔空地跳廣場舞足足2年時間，全年無休但從來沒有被人趕走。其中有個大媽就話：「3個月1次，你1個月都得，可以嚟試吓1個月！」當工作人員問空地明明屬於康文署但就收費跳舞，會不會被人趕走，幾位大媽即刻拍心口說不會，個個跳了幾年都無事，甚至話：「呢度係全民運動嘅地方，就係俾啲人運動嘛係咪先！邊個趕你啫！」，連導師都好有信心地叫大家放心：「呢個位開咗之後，人哋覺得你慣咗，冇人嗰陣我隨時都用得啦。呢個位置管得幾好，冇人嚟踢波，所以可以嘅。」
居民周太見到雖然覺得很無理，但都好無奈，沒有解決辦法：「我覺得佢哋咁樣唔啱，你作為公眾嘅地方，政府係俾市民喺度運動、小朋友踩單車，佢唔可以變成商業地方，如果要收錢成個公園就變咗質。」另一位居民都很不滿：「呢個係商業嘢，但呢度始終係休憩地方，政府應該叫佢哋租體育館搞興趣班。」最後《東張西望》發信問康文署，對方就話大媽已觸犯《遊樂場地規例》，如情況持續，職員就會採取執法行動。究竟最後會不會執法？大家拭目以待。
(TVB電視截圖)
(TVB電視截圖)