做人媽媽甚艱難，要母兼父職更難，近日呂慧儀與前夫黃文迪發出聯合聲明表示已於2018年離婚，正式宣布做單親媽媽。雖然身邊缺少男人，又要忙於拍攝《愛‧回家之開心速遞》，不過呂慧儀依然可以獨自照顧囝囝Martin，這幾天都是她親自帶囝囝上學，再行山散步準備上班拍劇。除了她，其實曾華倩都是個出名的廿四孝盡責好媽媽，儘管一生感情波折，但離婚後為了給予囝囝林浩賢愛和關懷，讓他在健康的環境成長，不但做他頭號粉絲，日日凌晨4點30起床準備早餐，更加試過捱到感冒面癱疑中風，愛子之心溢於言表。
感情路多災多難 決心獨愛兒子
曾華倩父親是西醫，兩個哥哥同是名醫，自小家境不俗，可是感情路上卻波折重重。1982年先同梁朝偉相愛，當時曾華倩年僅17歲以為二人可終老，可惜拍拖6年期間經歷過3次分手又復合後，始終在1988年分手，有傳因為劉嘉玲介入，所以早前曾華倩如今提起梁朝偉依然很親切。試過有次見到「年輕版梁朝偉」稱號的吳肇軒，她說：「我都覺得佢有少少似我初戀情人偉仔，重拾回初戀感覺，不過心目中最正都係偉仔！」直至遇上商人林肇基，拍拖3年即在1996年結婚，並誕下囝囝，怎料6年後離婚。直至2005年，本來曾華倩與年輕9年的馬國明傳出緋聞，但據聞曾華倩囝囝反對戀情，曾華倩決定為他放棄終生幸福，至今保持單身。曾華倩曾稱未能為囝囝維持完整家庭感內疚，故多年來一直以仔為先，希望可以栽培他成才。
為仔不辭勞苦周圍走 曾捱到面癱疑中風
單親媽媽要母兼父職固然辛苦，但不代表囝囝獲得的愛會比人少，曾華倩就是超級媽媽的好例子。囝囝酷愛游水，故幼稚園2年級開始學游水，長大後被挑選入學校泳隊，要天天一大清早到游池練習。曾華倩不但每日凌晨4點30就起身準備早餐，去到5點30就做司機驅車載囝囝去沙田馬會游泳池練水；囝囝海外出賽時，曾華倩亦例必現身支持、打氣，見證他每個重要時刻；即使囝囝學校有測驗考試，她也定必陪同溫習，操心功課。要抽時間照顧囝囝，同時間都要賺錢養家，連自己的生活和朋友都惟有放在一邊，生活喘不過氣。曾華倩早前主持亞視節目《今晚見》就曾經口齒不清兼面肌失調，當時網民很擔心她有中風先兆。好在曾華倩仲識講笑，話自己冇事，只是更年期令體力衰退，一旦操勞過度就會難以負荷，結果食完感冒藥就影響到面部肌肉：「由朝早密集錄影同訪問至夜晚，中間又要跳舞，原來年紀大唔可以太辛苦。」
不過曾華倩話見到囝囝就開心，所以一切付出都好值得：「有時見我攤喺床，會走埋嚟摸一摸我額頭、問我係唔係唔舒服，需唔需要啲乜……好窩心好體貼。咁多年付出咁多，有時趕頭趕命朋友都笑我：『你使唔使呀！』我想話真係好值！所以唔可以用個捱字，根本佢一出世就係我嘅責任，我只係做應該做嘅事，養兒一百歲，長憂九十九！個仔永遠係第1位，所有對佢好嘅嘢，我都會去做！細個最怕佢會病，好緊張佢夠唔夠營養，由細到大我鼓勵佢做運動，同埋畀最好嘅營養佢，我會盡量安排時間去陪佢，一手一腳湊大佢。」，充份表現出偉大的母愛勝過一切。
不做虎媽做慈母 母子相依為命好幸福
多得曾華倩悉心照料，囝囝發育得好好，身高足足有1.91米，除了成為港隊成員奪獎無數，如今更在香港大學修讀運動科學，好爭氣。媽媽曾華倩的付出，囝囝都心領神會：「阿媽車出車入送我去練習，我明白都係為咗俾我喺車上休息，所以每次我游到好成績，第1時間係睇吓媽咪有咩反應。佢為我付出咗好多，所以我嘅成功唔單止屬於自己同教練，媽咪都有份！」而曾華倩每次講起囝囝亦會一臉春光，完全不覺得辛苦，更加形容囝囝是情人、是偶像：「佢係我嘅前世情人，所以今世要照顧佢。而我絕對係個仔嘅top fan，我想佢知道，無論點樣阿媽都係佢嘅最強後盾。咁我當然係好攰，但係個仔又要練水又要返學，佢仲攰過我。依家見到佢喺自己鍾意嘅範疇攞到好成績，我都好感恩」，果然是有仔萬事足。
母慈子孝，從曾華倩社交平台見到多幅母子合照，就可見他們感情深厚，她說：「最緊要佢健康聽話，細個佢會整啲DIY嘢，大個咗就少啲我都冇所謂，試過錫一啖囉！有次佢突然叫我做『華倩』我覺得好怪，但都開心，佢好似當我朋友咁。」 ，可算是苦盡甘來。