屋企曱甴多到驚 強嫂教你消滅佢【強嫂家務小知識】

各位好啊，今日Happy Friday 又見到我強嫂啦！有我強嫂出現梗係有嘢要開心share啦！最近天氣咁潮濕，有冇啲小強(曱甴) 走晒出嚟同你打招呼呢？屋企有小朋友，最大嘅敵人就係啲蛇蟲鼠蟻！我呢啲要保持住屋企乾淨嘅完美主義者，絕對唔會容許小強可以喺我屋企出現！

作為父母，細路健康咁成長就係我最大嘅心願！(講到呢度就有啲眼濕濕) 即係咁，如果成日用啲噴霧殺曱甴，又驚影響細路仔啲呼吸道健康，用拖鞋消滅佢又怕啲有菌嘅卵飛到周屋都係！既然係咁，我決定問下我閨蜜Winnie (家務助理導師)，請教下佢殺曱甴嘅貼士！

Winnie話，我哋唔一定要用噴霧嚟殺曱甴！試下啲天然又潮啲嘅方法同樣可以做到殺曱甴嘅效果！例如可以用啲切好咗嘅洋蔥片、新鮮黃瓜、焗過嘅桔皮、檸檬皮等等放喺小強最常出沒嘅地方，啲小強就唔敢埋身啦！

另外仲可以將啲糖同梳打粉各撈一半，放係啲隱蔽少少嘅地方，等3-14日左右，啲小強就變「失蹤人口」啦！Winnie仲話，我哋可以自製「曱甴藥」令啲小強升仙。只要將洗衣粉撒喺小強出沒嘅地方，佢哋食咗就必死無疑啊！

咪話我唔提你啦，有一點要記住！就係屋企裡面唔好放大量紙盒同報紙呢啲紙類嘅嘢，因為啲小強嘅安樂窩就係呢啲地方啊！

唔好講咁多，一於睇下我嘅強嫂KO小強懶人包啦

{{hket:inline-image name="21da158a-9264-44a8-bf63-e3c202dbc352.jpg"}}{{/hket:inline-image}}

(嗚謝資深家務助理導師Winnie Cheung提供資料)

精選健康知識，盡在 Healthy Life 健康男女
https://fb.com/HealthyLifeExpress/