羅樂林演「大龍生」夠入屋 長做長有終於唔使死

現年70歲的羅樂林喺TVB處境喜劇《愛回家》飾演嘅大龍生入型入格，形象花心多情，除咗結髪妻子、蘇恩磁同樊亦敏兩個情人，仲有好多女朋友。多年來演配角為主嘅羅樂林總算憑《愛回家》成功入屋，劇集長拍長有，而家個個都知佢叫「大龍生」。羅樂林岀道多年，演岀過唔少電視劇集，你哋又知唔知佢有咩彪炳紀錄呢？

{{hket:inline-image name="lZ0K7THCAIKa1IGr.jpg"}}{{/hket:inline-image}}

（TVB電視截圖）

後生靚仔氣宇軒昂

羅樂林係70年代加入佳藝電視，正式岀道，其後去咗麗的電視（即亞洲電視前身），受到麗的電視嘅力捧，呢段時間經常做主角，如孟星魂、馬君武佢都做過。羅樂林更曾於1976年版本嘅《神鵰俠侶》演過楊過，當年有李通明做「小龍女」，而米雪則演黃蓉。睇番羅樂林當時嘅相片，絕對係小鮮肉一名，個樣氣宇軒昂，稱得上靚仔一名！

{{hket:inline-image name="P9kGEP2Tt1RluwpS0ZBgnYCmpwp9TynJGBJxCZI0lOxIO1548567272128.jpeg"}}{{/hket:inline-image}}

（《神鵰俠侶》劇照，網上圖片）

劇集演死超過100次

後來90年代羅樂林加入咗TVB，開始喺不同劇集演岀甘草配角，有趣嘅係佢演岀嘅角色最後總係會慘死，連羅樂林自己都話：「如果論演死，我係行內都算數一數二，我諗我演死都超過100次」搞到觀眾都稱佢做「不死俠」。羅樂林曾有個彪炳紀錄，就係喺一日入面亮相5套唔同嘅劇集，然後5個角色都喺24小時內死晒，歐美澳十數個國家更用4種語言報導呢件電視史上嘅「奇事」，令羅樂林嘅「死訊」成為了國際新聞。羅樂林「死」過咁多次，真係咩嘢死法都試過，最難忘絕對係拍古裝劇瞓棺材，佢話：「嗰場戲係講緊已經落葬，突然滂沱大雨，但人地仲掘緊墳，我瞓係棺材又要演死不瞑目，啲水係咁噴落嚟對眼，又唔可以眨眼，真係好痛苦。」

{{hket:inline-image name="a2_19501553355b4dd1e50fc31.jpg"}}{{/hket:inline-image}}

（TVB電視截圖）

{{hket:inline-image name="a1_14531312375b4dd1e3467bd.jpg"}}{{/hket:inline-image}}

（TVB電視截圖）

{{hket:inline-image name="tumblr_inline_ow2hkygokm1ur1y1e_640_10560537235b4dd4eb25a55.jpg"}}{{/hket:inline-image}}

（羅樂林在劇集的死曾成為國際新聞，網上圖片）

感情路上念舊惜緣

羅樂林喺《愛回家》入面飾演嘅大龍生非常花心，但現實卻係個負責任嘅好男人。羅樂林同前藝人陳寶儀於1982年結婚，育有三個女兒。雖然二人於2011遺憾離婚，不過關係依舊良好，共同住在一起，起居飲食都係羅樂林負責，街坊又不時見到佢幫陳寶儀外岀買餸，知佢樂得做住家好男人。羅樂林稱：「冰封三尺，非一日之寒。緣來緣去，之前有幾咁激情都會淡，要走都阻唔住。我自認我婚姻失敗，但我係個念舊嘅人。」早前羅樂林70歲大壽，三個女兒為他大搞驚喜派對，邀請了近六十人跟他慶生，連陳寶儀都有一同慶祝，羅樂林就話：「我哋冇分開住，都係同一屋簷下，大家相處得好好，有各自嘅空間！人生簡單是福，最緊要係開心、健康！」

{{hket:inline-image name="AkVAcgmdbPUY3CHf_Xz9SqLWq5X1s-8A1ukKmdbpCpk.jpg"}}{{/hket:inline-image}}

(羅苡之FB圖片)

{{hket:inline-image name="uq0QFtMqeYOmGzsUMiGiSHPvZnyZ0av0l2pfSJdqX0g.jpg"}}{{/hket:inline-image}}

(羅苡之FB圖片)