陳榮峻早前為《愛·回家之開心速遞》獻上螢幕第1次，首次以譚道德身分全裸亮相，震撼不少觀眾。除此之外其老婆吳香倫飾演的譚何容儀都好有喜劇感，猶如以前古板訓導女老師一樣，滿口仁義道德。不少觀眾大讚兩公婆無論戲裡戲外都咁甜蜜，襯到絕，希望他們多點戲分。但不講不知道，原來他們的黃昏戀得來不易，一開始陳榮峻經歷過生死邊緣、子女鼓勵與包容才能走出前妻病逝的陰霾，鼓起勇氣向吳香倫當眾求婚。以為排除萬難。怎料吳香倫患上嚴重肺炎，幸而福大命大，二人終可牽手同度下半生。日前有記者又拍到他們拖手在跑馬地拍拖，途中不斷談話，非常恩愛。
(TVB電視截圖)
戲假情真因劇結緣 吳香倫陪伴走過喪妻陰霾
未相戀之前，陳榮峻與吳香倫的背景頗大分別。吳香倫出身演藝世家，爸爸是粵語長片影星，妹妹是歌手，所以早在9歲已被發掘參加劇團，11歲在荔園登台，15歲後憑民歌《紡織姑娘》贏歌唱比賽冠軍，17歲加入TVB成為《歡樂今宵》合約歌手，正式出道做登台歌手。當年吳香倫雖然只是小學畢業，不過她一邊進修英語，一邊唱歌，出過多張大熱雜錦專輯。後來吳香倫突然轉型做演員，多在劇集客串。至於陳榮峻曾任職佳藝電視龍虎武師、整冷氣、兼職揸的士，26歲已跟首任老婆結婚，育有2子1女，輾轉在28歲才入行做演員，當時他還邊在酒店打工，邊拍劇做配角。因為一次斷肋骨經歷，陳榮峻決心不再做風度翩翩、有型有款的男主角，反而安心做反派配角，還繼續當的士司機、小巴司機、旅遊領隊和電工。
二人雖然入行多年，不過都沒有合作機會，直至2010年，陳榮峻老婆因腦血管爆裂而猝逝 ，結婚29年突然失去至愛的陳榮峻情緒崩潰，一度自殺尋死。去到2011年，他與吳香倫飾演夫婦根叔根嬸都未撻著，2014年他們再因《食為奴》合作，遠在橫店拍外景，二人終於交換了電話。當時陳榮峻同吳香倫好投契，知道她教唱歌，就主動要求上堂，結果他們決定於卡啦OK約會。有個伴，陳榮峻開始走出喪妻陰霾，發現自己對吳香倫有好感，於是膽粗粗主動拖手，認定對方：「太太走咗當然會傷心，不過仔大女大讀完書有埋家庭，我就自己一個人，有時都想有個人陪吓自己睇戲。啲仔女都好尊重，覺得我搵多個伴係好事。我知道佢（吳香倫）教唱歌就跟佢學，過程入面大家都係出下街。過馬路借頭借路拖手仔，無俾人fing開咪即係接受咗囉，直到我哋一齊，我都冇講出口表白。」，就像學生puppy love一樣溫馨浪漫。
求婚成功共諧連理多得黃翠如
經歷20年婚姻，陳榮峻面對新戀情，開始萌生再婚的念頭，給拍拖3年的吳香倫一個名份：「我覺得佢好孝順，佢為咗照顧阿媽，直到而家都冇結婚。」黃翠如曾經飾演過陳榮峻女兒，正是她一句話，令陳榮峻決定當眾求婚：「翠如成日叫我快啲同Helen求婚，我答：『我呢啲老嘢求咩婚呀？』，佢話：『你唔求婚鬼嫁你呀？咁你想同佢一世嗰個想你求婚呀嘛。』」2017年尾，TVB大搞盆菜宴，陳榮峻當住2000多人面前下跪求婚。
翌年兩人在聖母無原罪主教座堂結婚，當時吳香倫一宣讀誓言即淚如雨下，去到交換戒指、揭頭紗，正式宣布為合法夫妻時，吳香倫再次落下幸福眼淚，場面感動。陳榮峻見到就話：「唔使咁激動，簽咗字，我係你老公喇！我會繼續做你嘅人肉鬧鐘，你唔識煮飯，我識，我會照顧你一生一世，畀你永遠幸福、快樂。」，搞笑又甜蜜。
吳香倫確診肺炎 陳榮峻自責後格外珍惜
本來他們相愛路途已經比普通情侶吃力，陳榮峻要走出首任老婆死去的痛苦；吳香倫同樣要接受一位曾經結婚有仔女的男人，如今能開花結果，真是可喜可賀。但命運又再捉弄他們，正當二人準備到歐洲上郵輪，去地中海度蜜月時，竟發現久咳未癒的吳香倫一邊肺一半花晒，另一邊肺3分1花晒，，證實患上嚴重肺炎。明明已經脫離喪妻陰影，偏偏新婚老婆身體又有事，陳榮峻哥大受打擊，特別緊張，並傷心到非常自責，以為噩運再度降臨：「嗰陣時心裡面好似被大鐵鎚擊咗一下，心諗點解又係我？點解唔好嘅嘢都降臨喺我身上？我係唔係做錯咗啲乜？」反而吳香倫連忙安慰老公：「唔會，我冇事，我依家仲好哋哋企喺你面前。」
陳榮峻愛妻心切，打算取消蜜月旅行，連行李都不執拾，希望吳香倫病好好才出發，唯獨她堅決要去。雖然陳榮峻旅行期間都非常擔心，未能全心享受，幸而吳香倫準時食藥令病情得以控制，現在情況穩定，陳榮峻終於放下心頭大石：「之前我根本冇心情再去度蜜月，但香倫一直求我唔好取消。好在依家好返8成，我都放心，可能嗰輪搞結婚太忙！肺炎可大可小，都嚴重，我個女都喺紐西蘭做護士，佢睇完片都覺得冇理由冇事！」
經歷過風浪，他們比以前更浪漫，愛玩自拍又十指緊扣拍拖，如初戀般甜蜜，仲sweet過後生仔。希望他們白頭偕老，永結同心！最重要健健康康。