日前，吳岱融（Hugo）出席TVB《大醬園》造型記者會時，透露今次喺劇集中將會飾演慈父角色，「我係一個傳統嘅守業者，好照顧自己嘅仔女，係慈父，亦絕對係一個好人，終於有機會做返一次好人。」成日做奸角，「奸」到深入民心嘅Hugo，就話「好人唔易做」，因為演正派喺語氣上要比較收斂，難過演反派。但其實喺現實中，Hugo都係一位100分嘅好爸爸，所以相信呢個角色絕對難佢唔到！
Hugo囝囝吳政樺（Justin）喺吉隆坡出世，當時Hugo因為要經常去唔同地方拍戲，但又想同家人一齊，所以老婆同囝囝就跟住Hugo「周圍走」，喺香港、新加坡、大陸番禺三個地方暫住。Hugo曾為此感到抱歉：「其實喺個仔讀書嘅時候，要佢走嚟走去，我都有啲對佢唔住，但最主要係我想同屋企人一齊。」仲話唔需要囝囝飛黃騰達，最緊要活得開心就足夠。
佢同囝囝仲曾經一齊拍攝TVB父親節特輯《爸爸的告白》，盡訴心中父子情。Hugo喺節目上不但憶起好多往事，仲同囝囝表示：「爸爸為咗你，乜都得。」Hugo指自己會稱呼囝囝做「BB」，兩人感情深厚，唔止一齊打機，更一齊學跆拳道。Hugo憶述當年為咗令Justin多運動，於是安排佢去會所學跆拳道，而班上年紀最大嘅學生都只係得十幾歲，但自己為咗陪囝囝一齊玩，所以做咗超齡學生。另外，因為Justin小時候偏食，Hugo特意親自下廚炮製「Daddy炒飯」，將所有材料切成小粒炒飯，餵到Justin口中。Justin對此亦非常回味，仲話至今都冇食過比「Daddy炒飯」更好味嘅炒飯，氹得Hugo不亦樂乎。
（TVB電視截圖）
雖然Hugo喺鏡頭前霸氣盡現，但現實中絕對唔係嚴父。Hugo畀囝囝有好大嘅自由度，亦都鼓勵囝囝從挫敗中學習。Hugo指，有次叮囑Justin曬太陽唔可以曬太耐，結果Justin未有理會，於是就任由囝囝曬傷，畀佢一嚐矖傷嘅滋味。不過，正所謂「傷在你身，痛在我心」，Hugo又憶起多年前，Justin踩單車嘅時候受傷，但又冇出聲，後來發現傷勢嚴重，出現後遺症，令Hugo大感心痛，至今仍留下遺憾。隨後就喺節目上同Justin表示：「依啲就係爸爸媽媽會擔心嘅嘢，但你係個體，我哋都要畀你去飛。」
（TVB電視截圖）
節目末段，Hugo仲向囝囝深情剖白：「其實一路以嚟，你爸爸我都係一個大細路，我自覺都唔係好識得教人。好彩喺過程入面，有婆婆有媽咪，一齊幫手，幫你爸爸同你繼續成長，因為有時我覺得自己有好多嘢，未必做得好好。我作為演員，有時候會比較情緒化，你仲細，未必會明白，又唔知點應對我嘅情緒，但希望你唔好介意，爸爸係愛你㗎。亦都好慶幸，你細細個已經好懂事成熟，甚至幫助爸爸，照顧爸爸。我真係好感恩能夠有一個好似你咁懂事嘅囝囝，I Love You。」太太同囝囝聽完都眼濕濕，非常感動。
（TVB電視截圖）