樊亦敏（Amy）被形容是圈中的俠女，2011年武打巨星劉家輝師傅因中風癱瘓，跟家人出現爭拗，前女助手更騙財銷聲匿跡，當時Amy出面為劉師傅討回公道，爭取返200萬留來作老人院的住宿和養病之用。Amy指一向尊稱劉家輝做師傅，但兩人非師徒關係，她說：「每次講起師傅我都好低調，因為牽涉到他同家人嘅事，好多人覺得你又唔係佢邊個，點解要做咁多嘢？我只能夠講，路行到呢度，我做相應的事。」她直言有嘗試交給師傅身邊的人，可惜對方表示一向沒空就拒絕，她說：「當時師傅中風，同家人有少少衝突，師傅想留喺香港，不想去外國，為咗方便女助手留香港照顧師傅，我就托律師朋友幫佢申請助手成為委託人。後來知道助手有問題，而師傅亦表示不想再由佢做委託人。我本身想做好事，但事與願違搞成咁，我覺得自己有責任去做適當嘅安排畀師傅。加上一直以來我都認識佢助手，師傅好多工作安排同財政情況我都知道，所以我好清楚筆錢去咗邊度，我有足夠理據幫師傅爭取返啲錢。」
Amy為朋友出心出力, 換來卻是外間對她的冷言冷語。(《晴報》圖片)
Amy為劉師傅取回200萬身家，用作居住安老院和養病之用。(網上圖片)
Amy的律師朋友為正義而打官司，大家都沒有收取大筆律師費。(網上圖片)
「我有少少修為，要忍辱」
Amy無酬去找律師朋友幫忙，她說：「我相識的律師朋友知道事實，覺得有需要為師傅爭取返啲錢去養病，其實以師傅嘅資金去打呢場官司根本無可能，單係文件費都180萬，當時連高等法院大法官都好奇怪，點解咁細銀碼會動用到我朋友咁地位好高、好資深嘅大律師，佢答係為正義而打。」Amy動用人情牌為師傅爭取應有的事，但過程中卻受盡冷言冷語，她說：「過程中睇到好多事，好多人唔了解我、唔認識我，問我係咪同師傅有路？係咪貪錢？係咪暗戀佢？唔緊要，你唔了解件事，你講出嚟嘅說話只係反映出你自己係咩人，我希望係發放正能量，我有少少修為，唯有忍辱，我清楚自己做緊乜。」Amy花了近7年的時間去做這件事，她沒後悔為朋友、為公義挺身而出，而她亦不時會探望師傅，「我琴日探師傳，佢成日都嫌院社食物淡唔好食，咁啱朋友仔去探佢，蝦餃、叉燒包，燒腩卷等等，違反晒院規，不過算啦一次半次。我成日同師傅講係時間問題，可能仔女一時未明白你，將來身體好返，可以再同仔女去傾，他自己有病真係需要錢，繼續生存下來。」
Amy形容跟師傅風馬牛不相及，律師團隊、精神科醫生和院舍的人員都是同心為一件事，所以她不會居功，只是做自己應做的事。她說：「現今人類好幸福，起碼無戰爭，我總覺得世界是由大家活出嚟，大家付出多少少愛，世界就會變得好靚。」
Amy信奉道教，認為信仰令她更加心存善念。(《晴報》圖片)
信奉道教 工作機遇隨緣
Amy在單親家庭成長，很多事情都觀察入微，小時候特別喜歡逛廟宇，後來因為鬼剃頭的病，她苦尋醫治的方法，後來去廟宇求籤，她說：「好神奇求完籤就搵到合適嘅醫生醫我，我份人答應過嘅就一定會做，所以我去還願。其實人生總有低點或高點，低點你會自覺運氣好差，好多嘢諗唔通，睇完典籍，就覺得其實只係你想得到嘅嘢得唔到，始終人會有迷惘時，問籤會答到你。世界上好似空氣咁，你睇唔到但存在，靠佢滋養生命，而且宗教係導人向善，教你點調服你個心去對待萬事萬物。」入行初期因鬼剃頭失機會，在內地發展後，現時只能成為配角，Amy沒有半點不甘心，她說：「我一向好信命，自己身體唔得，做過就ok，享受過就不可以貪戀，當然我都想遇到更加好的角色發揮，其實《愛回家之開心速遞》入面三太嘅角色都將另一個我爆發出嚟，演得開心，依家最重要係角色出嚟，觀眾接受又睇得開心。你要求我一星期瞓一個鐘？我唔得，先天性唔可以，做戲係人生一部分，但我可以做人生其他嘅事。」
劇集中總是演一些配角，但Amy笑言：「你要我一星期瞓一個鐘，我唔得囉！」(網上圖片)
三太角色抵死又搞笑，Amy演得開心，觀眾亦睇得過癮。(圖片：《愛回家之開心速遞》電視截圖)