洗衣機污糟過廁所？強嫂教你2招天然洗機法【強嫂家務小知識】

今日開心星期五又係強嫂我啦！上星期教完大家點殺滅小強之後，見大家嘅反應唔錯，梗係繼續請教我閨蜜Winnie(家務助理導師)啦！之前有新聞報道過洗衣機係致敏嘅兇手，大家都知我最鍚就係強仔強女，我又點會畀敏感症有機可乘吖！

係咪諗都冇諗過洗衣機幫我哋洗衫，原來佢先係最污糟！唔好怪佢啦，要怪就怪你自己啦！自己諗下，部機跟咗你咁多年，從來都冇人關心過佢，所有你哋著過嘅衫褲都係靠佢幫你洗得乾乾淨淨，但從來都冇人幫佢清潔下！

嗱！咪話我吖，洗衣機唔洗好易變成過敏兇手！所以如果你哋部機唔算係新，洗機行動真係刻不容緩啊！坊間有得賣洗衣機槽嘅清潔劑，大家都可以試下買嚟玩下嘅！

話明教你天然方法，強嫂我又點會老點你吖！Winnie教我，每隔一個月左右洗衣機就應該洗一次。平時可以用500g嘅梳打粉加一枝白醋倒入洗衣機槽裡面，撳普通洗衫程序就OK！另外，可以用條冇用嘅白毛巾，放落洗衣機當吉機咁洗，啲污糟嘢就會黐住晒喺條毛巾到啦！

仲有啲小貼士要提下大家啦！千祈咪用漂白水洗部機啊，一陣過清水唔夠徹底，殘留喺機糟裡面嘅漂白水會令下一次洗嘅衫甩色，仲有機會令洗衣機糟零件受損！每次洗完衫之後要記住抺乾機門嘅膠邊同埋打開佢通通風，廢事膠邊發霉啦！

{{hket:inline-image name="tip.jpg"}}{{/hket:inline-image}}

(嗚謝資深家務助理導師Winnie Cheung提供資料)

精選健康知識，盡在 Healthy Life 健康男女
https://fb.com/HealthyLifeExpress/