曹永廉驚爆糖尿隱憂 從欠債到犧牲色相苦不堪言

現年54歲的曹永廉歷盡人生高低起跌，先因為做歌手欠下10多萬卡數，怎料初入TVB卻只得月薪幾千元，一度陷入財困，淪落到要問家人借錢度日，最終搞到患上抑鬱症，天天不停大喊。昨晚他在阿旦鄭丹瑞主持的新節目《快樂中年》更自爆有糖尿病遺傳基因，是高危一族！雖然曹永廉入行25年一直浮浮沉沉，直到近年因為犧牲尊嚴，演不男不女的角色才受賞識做到男一，此時此刻卻要注重身體健康，不能捱夜、亂吃東西，但他坦言已經睇化了：「自己知自己事」，認真慘情。

由做清潔工人做到藝人 搞到欠債兼患抑鬱症

曹永廉家境貧困，因父親的假髮廠和製衣廠生意失敗，於是舉家被逼搬到九龍塘木屋區居住。中五畢業之後曹永廉為養家做過很多行業，包括快餐店、清潔工人、女性胸圍銷售員、連鎖超級市場分店經理等。直到1994年，他勇奪TVB《1994年度十大勁歌金曲頒獎典禮》的「最受歡迎新人獎（男歌星）銅獎」，成功入行做歌手，2年間推出過3張個人專輯。可惜發展平平，做歌手收入有限，出騷的服裝卻要自費，曹永廉惟有頂硬上，信用卡碌爆，欠下銀行10多萬卡數，戶口只得幾百蚊，只能一直還最低還款額：「當時冇收入，咁大個仔仲要問屋企攞錢好唔舒服。」最終曹永廉因為壓力太大，患上抑鬱症。走投無路下曹永廉決定放棄歌手夢，在TVB轉行做演員。可惜當時人氣太低，就算曹永廉參演過多部電視劇，人工亦只有幾千元，他當時不禁捉住經理人爆喊。幸而曹永廉拍《妙手仁心III》認識邵美琪，當她知道曹永廉欠下一身卡數，還得很辛苦，馬上義氣仔女上身，破例與曹永廉組情侶檔出騷，令他工作機會增加，終於慢慢還清債務，走出人生低谷。

{{hket:inline-image name="17.jpg"}}{{/hket:inline-image}}

(TVB電視截圖)

入行25年靠露股終做男一

2007年，曹永廉與姜大偉的大女姜依蘭結婚，事業開始起步。先在《法證先峰》的沈雄、《金石良緣》的金永來以及《大太監》的安德海都深受劇迷愛戴，2016年更憑《公公出宮》的細雞陳小鳳帶來第一次「最佳男配角」殊榮。可以演活不男不女的角色，令觀眾印象深刻，最後都要多虧自己的犧牲。曹永廉笑言：「啱啱開頭嗰2集，有一場喺架火車度講我中咗槍，我哋成班坐火車偷走，大家幫轉止血，攞啲煙花...第1，我真係露咗蘿柚，第2係嗰場戲嘅感覺幾好笑㗎。你估易啊？我反轉露（私人部位）都得啊！」，鄭旦瑞聽到都好佩服，大讚曹永廉肯博。

{{hket:inline-image name="16.jpg"}}{{/hket:inline-image}}

(TVB電視截圖)

{{hket:inline-image name="114.jpg"}}{{/hket:inline-image}}

(TVB電視截圖)

{{hket:inline-image name="115.jpg"}}{{/hket:inline-image}}

(TVB電視截圖)

{{hket:inline-image name="13.jpg"}}{{/hket:inline-image}}

(TVB電視截圖)

拍了60部劇集，嘗試過不同角色，去到近年踏入綜藝，曹永廉以搞笑詼諧的主持風格成功入屋之餘，還與好兄弟蕭正楠奪得「最受歡迎電視拍檔」。入行25年終於上位，能夠撐下去不容易，鄭丹瑞問曹永廉會不會不忿，他就話自己已沒鬥心，這些年來都是多得黎耀祥與蕭正楠的支持，他說：「我識咗一班好兄弟，佢哋真係好多嘢都好支持我。我唔係一個好有上進心嘅人嚟，你話我由頭到尾係咪好想做男主角呢？真係從來都冇諗過，自己知自己事，如果早10幾年你畀我做男一，早就熄電視啦。所以我從來都冇計較呢啲嘢，最緊要出糧。喺呢行成日都會迷失咗，到底我得唔得呢？觀眾鍾唔鍾意？近呢幾年可能好咗啲，個人開朗啲。」

{{hket:inline-image name="14.jpg"}}{{/hket:inline-image}}

(TVB電視截圖)

成功上位卻被糖尿牽制

曹永廉為人風趣幽默，在娛樂圈中是出了名好人緣和多朋友，雖則個人性格樂天，但他自小患有哮喘，身體不好，甚至驚爆有遺傳性糖尿病！「依家會留意咗，一來家族遺傳病好難避免到，唯一避免到少食啲有糖分嘅嘢。如果出外景，我會好小心食嘢，因為依家出面食親嘢都係好肥膩。」可是一旦上位做男一，拍劇時間定必日夜顛倒，食無定時，難得有彈起的機會，相信好多粉絲都希望糖尿病隱憂不會影響曹永廉。保重！

{{hket:inline-image name="15.jpg"}}{{/hket:inline-image}}

(TVB電視截圖)