「世紀宿敵」陳冠希（Edison）同余文樂2000年同期出道，憑佢哋俊美嘅外形迷倒唔少少女，當時二人路線相近，所以喺歌壇同影壇都鬥到難分難解，更加屢傳不和。當時有指兩人同時追求鍾欣潼（阿嬌），後來一齊出席《勁歌金曲頒獎禮》，喺後台更發生「撞膊」事件，即場爆粗互鬧，更有傳二人爭啲「講手」。後來陳冠希同余文樂先後進軍潮界，久唔久都會喺網上隔空罵戰，正宗冤家。
大家都係後生仔，曾經合作多部電影！
今日水火不容。
有你冇我！
當時有指兩人因同時追求阿嬌而交惡。
2017年網上互寸
前年樂仔嘅時裝設計師好友Godfrey Kwan喺IG上載一件牛仔褸新品，Edison忽然反應勁大，喺該Post連環留言「LOL」、「NEW SLAVE」、「SADNESS」，更批評對方「FEEL SORRY FOR U BRO / BUT EVERYONE NEED TO MAKE A LIVING」意指為對方感到好難過，有時為咗生活都要搵錢，十足小學生撩交嗌一樣。
不過樂仔亦不甘示弱，在個人Instagram上留下美國著名歌手Frank Sinatra的名句「The Best Revenge is Massive Success」，擺明暗寸對方敗走香港娛樂圈。
Edison之後喺Instagram反撃「MASSIVE SUCCESS = YOUR BRAND SELLING AT DOVER STREET 」，表明自家品牌在英國倫敦高檔時裝店Dover Street Market中寄賣，暗寸樂仔經營嘅潮牌發展不如佢。
周圍有「牙齒印」
其實除咗余文樂之外，陳冠希喺圈中都有好多「敵人」，今年２月有網民指佢好友楊千嬅同陳奕迅都撐樂仔嘅潮牌辣㷫咗Edison，話佢哋唔係佢朋友，廢人係物以類聚，話自己係唔同層次，唔好將佢同啲陰險小人相提並論，火藥味勁濃。
昨日世紀同場
「無敵是最寂寞」，正當大家都覺得「世界將佢包圍」嘅時候，原來Edison都有真朋友！Edison昨日出席一個藝術展嘅時候同劉嘉玲搭晒膊頭合照，Edison仲留言：「REAL FRIENDS LAST FOREVER / FAKE FRIENDS LAST FORNEVER 」（真心嘅朋友經得起時間考驗／假意嘅朋友唔會長久。）似乎緊暗寸其他娛圏嘅舊朋友。
另一邊廂，有消息指余文樂原來都有去到呢一個藝術展，即係原來佢哋曾經世紀同場！不過樂仔到場冇耐就走咗，事後仲喺自己IG Post去放狗嘅Story，藝術展話太多人，都係去散步好，寧願陪狗仔都唔留喺現場，仲話人少比較好，似乎係意有所指，互相唔妥到出晒面，連喺同一個空間呼吸都唔想！
小二，唔該畀多兩碟花生。