陳豪︰用一生幸福回報老婆

陳豪（阿Mo）昨日出席健康產品活動，與擔任司儀的「HeHe拍檔」森美喜相逢。談到阿Mo獲太太陳茵媺（Aimee）在社交網站上載其照片並大讚他Handsome，他亦隔空發表愛的宣言。

被蒙在鼓裏的阿Mo得悉太太舉動，不免露出幸福笑容，他笑言完全不知太太在社交網站分享甚麼，因他只懂發文，甚少睇別人的發帖，更自認Old School，懂得用智能電話已大有進步。他說︰「老婆係我嘅Angel，難得娶到個好老婆，佢又願意喺事業高峰時為我生咗三個咁可愛嘅小朋友，試問有幾多個女人做得到呢？所以我會記住佢嘅好，用一生嘅時間及幸福去回報佢！」

曾是滑浪高手

阿Mo又自爆年輕時在澳洲是Beach Boy，而他初到香港時也有滑浪，目前他的滑浪板仍寄存在大浪灣，只是近年因工作及家庭而疏於練習。他坦言現在最忙是幫小朋友睇功課，不過他堅持不會替孩子做「槍手」，他說︰「好似學校要個仔整西多士畀媽咪食，我示範一次後，個仔就照做一次，全程有拍片證明係佢親手做。其實我廚藝OK㗎，個仔學到幾成已好叻。」

森美自認外形上輸給他幾條街，阿Mo笑指森美太謙虛，反讚他是陽光男孩，為大家帶來很多歡樂，阿Mo笑謂︰「相信我哋開套《斷背男》都唔會畀人鬧，應該受歡迎。」

採訪︰Pauline

攝影︰林良明

編輯︰黃卉彤

美術︰梁政敏