陪妻抗癌 浪子回頭變暖男 梁漢文拍拖21周年曬恩愛

日前，梁漢文（Edmond）喺社交網站上貼出與妻子林文慧（Karen）嘅合照，留言指：「其實我本身係一個好鍾意慶祝嘅人，就算發現呢個月少咗條白頭髮我都會搵個藉口出去慶祝，今日喺我哋拍拖21週年，慶祝啦喂。」唔經唔覺，原來佢哋兩個已經一齊咗成21年，多年嚟互相扶持，經歷咗好多風風雨雨，其中太太不幸患上乳癌，更令Edmond浪子回頭變暖男。

{{hket:inline-image name="56331130_306255913396920_581185505057571194_n.jpg"}}{{/hket:inline-image}}

(梁漢文IG)

Edmond入行後認識咗Karen，對佢一見鍾情，於是展開咗10年愛情長跑，最終喺2008年正式拉埋天窗。婚後3年，太太Karen確診患上乳癌，當時正與Big Four喺美國舉行演唱會嘅Edmond，臨上台前一日先知太太患病，佢故作輕鬆地完成演唱會，隨後馬上回到香港陪住老婆。為免令太太嘅病情曝光，工作繁重嘅Edmond隻字不提，每日早上陪Karen去醫院檢查及做化療，然後再出門工作。太太嘅病對Edmond打擊好大，加上日以繼夜嘅工作，最終令佢壓力爆煲，有日開工時喺後台痛哭。好友張衛健、許志安及謝霆鋒等人知道後，紛紛向佢介紹名醫，用盡中西合壁嘅方法治病。

{{hket:inline-image name="34.jpg"}}{{/hket:inline-image}}

{{hket:inline-image name="13715292_1079294658806243_1158166514_n.jpg"}}{{/hket:inline-image}}

(梁漢文IG)

喺Karen患病嘅3年間，Edmond一直不離不棄，悉心照顧太太。佢曾指，知道太太患病後，最想就係一直喺身邊陪住佢：「無論幾忙，或者去幾遠嘅地方工作，我都一定會當日就返屋企陪太太。」佢坦言太太患病係兩人一齊面對過最大嘅考驗，亦改變咗佢好多，唔單止少咗出去玩，仲戒埋煙，就如「浪子回頭」一樣。除咗個人有所改變，心態上都變咗好多，Edmond學會更加珍惜眼前人。向來抗拒做肉麻嘢嘅佢：「當你好驚失去一個人時，幾肉麻嘅嘢你都會講同做。」Edmond憶述首次主動同太太講我愛你時，太太感動到喊，令佢非常難忘，自此知道愛要宣之於口，唔好畀自己有機會後悔。

{{hket:inline-image name="13117882_230796610619108_924440773_n.jpg"}}{{/hket:inline-image}}

(梁漢文IG)