郭羨妮（Sonija）在2011年10月1日跟內地動作導演朱少傑結婚，次年誕下一女Kylie，雖然經常分隔兩地，但兩公婆都相處有道，恩愛非常，也照顧得Kylie非常之好。Sonija笑言早已習慣這樣子的相處模式，但自己因工作要遠行時，一執行李已經忍不住落淚，她說：「掛住個女會喊，成日發生，我以為唔會發生，因為我畀幾多時間照顧佢。呢排我即將返大陸拍劇，開始執拾行李時已經崩潰咁喊，反而個女好乖，識得呵返我，佢見我流眼淚好緊張，即時拎紙巾幫我抹眼淚，佢話：『唔使驚啦，你帶埋隻狗仔去，呢隻狗仔就代表我，你攬住佢就好似攬住我一樣啦！』」囡囡今年7歲，識得倒轉頭安慰媽咪，真係好生性。Sonija認為跟老公已經習慣分隔兩地，特別珍惜一家三口相處的時光，但自己外出工作難免掛住個女，要分開十幾日，實在好耐無試過。Sonija稱自小就教育女兒，父母的工作所需要經常中港兩地走，遇到比較長時間離港，就會慢慢向女兒解釋：「我跟個女講媽咪想做個project，你要讀書長大，而我亦有自己想做的事。呢方面佢好明白，反而會反過來安慰我。」
Sonija認為做職業女性絕對不容易，最重要是要事業和家庭兩者得到平衡。（《晴報》圖片）
Sonija為今次廣告投入拍攝。（《晴報》圖片）
Sonija跟丈夫2011年拉埋天窗，翌年誕下愛女Kylie。(郭羨妮微博圖片)
老公是呷醋爸爸
假設Kylie是男仔的話，Sonija的處理方法會否有所不同？她說：「如果我的BB係仔，我真係唔識教，仔會活潑好多，我個女已經好活潑，已經快頂唔順，如果係仔周圍走、周圍曳，我諗我會崩潰。」Sonija直言老公是超級寵女狂，令她左右為難，她說：「我經常叫老公唔好咩都買畀個女，但我明白佢心態，因為成日唔喺度，佢好想補償畀個女，所以佢想要咩咪買囉。有次我哋一家三口行街經過，囡囡好想要買個水樽，我覺得不太合適，拒絕之後就拉走個女，點知返到屋企之後，老公扮出街買嘢，原來佢返轉頭買返個水樽畀個女，真係好易寵壞個女。」Sonija稱不會呷囡囡的醋，爸爸愛錫囡囡是應份的，而且老公眼光跟她差太遠，所以她警告老公不要再買禮物給她。她續言：「晨早已經講明唔畀阿女18歲之前拍拖，個女還是BB時已經講定。囡囡之前返幼稚園突然話有男朋友，仲要攬住晒咁影相返來。搞到我老公即時搞笑咁質問個女：『你係咪拍拖？同邊個拍拖？』激到爸爸死。我成日同老公講，將來阿女跟佢一齊工作，咁佢就可以睇實個女。」
郭羨妮跟丈夫經常中港兩地分隔，難得一家三口聚在一起，放閃是必須的。（郭羨妮微博圖片）
Sonija稱不會呷囡囡的醋，爸爸愛錫女兒的應份的。(郭羨妮微博圖片)
這位呷醋爸爸聽到囡囡幼稚園有男朋友，即時要搞笑質問落口供。(郭羨妮微博圖片)
Sonija婚後家庭和事業都兼顧得宜，絕對是職業女性的典範，她笑言不敢當：「我不會話自己好妥當，有時候好苦惱、好勞氣，只是大家不知道。我會選擇做職業女性的，我有家庭，亦想有自己事業，希望兩者兼顧，但要取個平衡。如果太多時間放在事業，咁個女功課點算呢？這種情況會令人擔心，相反如果花太多時間在家庭，好怕大家慢慢會忘記郭羨妮。我覺得香港女性好大壓力，我曾經睇過一個真人真事紀錄片，一位兒科ICU的女醫生經常要加班努力照顧別人的囡囡，但自己的囡囡卻無人照顧，實況正是如此，所以家庭和事業兩者要平衡。」
面對現時教育制度，不少家長都感到非常大的壓力和無助，Sonija直認有時候都被「媽媽Group」嚇親，她說：「各位家長唔好咁緊張，其實不需要咁緊張，我哋細個時其實都唔需要爸媽成日提住你點點點做，又無補習又無去學嘢，都可以健康開心成長。小朋友得幾歲人仔，點解要咁緊張呢？大家Relax 啲啦！」