14歲賺錢養家 供細佬讀大學 孝順女陳敏之歷盡辛酸

陳敏之憑住《怒火街頭》中妓女一角廣為人知，不過原來佢嘅性格同呢個角色一樣，都係好有「吉士」。依家身為幸福媽媽，事業家庭兩得意嘅陳敏之，原來曾經有過一段辛酸嘅童年。日前，佢喺旦哥主持嘅《快樂中年》節目上，憶起細個為屋企「捱世界」嘅日子，非常感人。

{{hket:inline-image name="233331.jpg"}}{{/hket:inline-image}}

（TVB電視截圖）

陳敏之喺節目上指，因為細個家境唔好，所以好早就出嚟工作賺錢幫補家計。佢14歲出道做兼職模特兒，一邊讀書一邊工作，將賺到嘅錢儲起，畀晒屋企人供樓，十分生性。佢話當年賺到嘅錢並唔多，為咗可以慳錢，每日都會去快餐店買麵包，一日三餐都只係食麵包。陳敏之指當時每日有幾份工作，如試鏡、拍照、拍廣告等，全部都肯做。不過，肯拼肯捱嘅佢，喺其他人眼中，卻被認為係「賺錢買花戴」。由於陳敏之從來冇將自己嘅身世告知其他人，所以佢亦懶理閒言閒語，繼續做好自己，默默耕耘。陳敏之由朝做到晚，結果有日體力不支暈倒，被好友送往醫院。當時因工作關係，化上濃妝嘅陳敏之，更被醫生誤以為是迷幻少女，令佢大感無奈。雖然辛苦，又被人誤解，但陳敏之未有因此放棄，一直努力賺錢，最終苦盡甘來，成功將家裡的財政問題解決。

{{hket:inline-image name="31748627_1704111576311028_2467619373393641472_n.jpg"}}{{/hket:inline-image}}

(陳敏之IG)

陳敏之形容自己係一個好辛苦嘅人，但活得開心。佢指即使自己依家賺到錢，仍然會先將錢用嚟解決屋企嘅大小事，家庭喺佢心目中永遠係第一。佢喺節目上亦憶起，喺爸爸臨終前，佢曾經向爸爸承諾過一定會供細佬上大學：「我冇乜錢，但你信我，我一定會搞掂細佬，我會令佢大學畢業。」陳敏之指，自己因經濟問題冇讀大學，唔希望細佬會好似自己咁，所以不惜一切都要供佢讀大學。最後得償所願，細佬大學畢業，陳敏之指自己感動得哭到崩潰。陳敏之為咗家人，可以話係毫無保留，真係令人佩服！

{{hket:inline-image name="49715083_245318099714210_3669805917745352261_n.jpg"}}{{/hket:inline-image}}

(陳敏之IG)