喺《愛．回家之開心速遞》入面，「安仔」周嘉洛同「朱凌凌」吳偉豪嘅HEHE兄弟情，令觀眾留下深刻印象。呢對CP深受歡迎，最近佢哋兩個仲孖住拍廣告，殺出一條新血路。周嘉洛同吳偉豪一齊為7-Eleven嘅自家品牌點心拍咗條宣傳片。喺片段中，兩人飾演一對感情深厚嘅好兄弟，吳偉豪要暫時離開嘉洛仔一段時間。嘉洛仔唔單止唔捨得吳偉豪，仲擔心佢食唔飽、著唔暖。一怒之下衝咗落街，喺街上諗返起兩人美好嘅回憶，最後嘉洛仔決定買7-Eleven嘅點心畀吳偉豪，代替自己「餵飽」吳偉豪，認真Sweet呀！
安仔無論在《愛回家》還是拍廣告，同朱凌凌都一樣咁溫馨。(網上短片截圖)
吳偉豪直言為今次拍攝，吞下好多粒燒賣。(網上短片截圖)
呢個深情對望，真係HEHE味濃到瀉。(網上短片截圖)
其實朱凌凌去長洲啫，唔使咁難捨難離呀嘛？(網上短片截圖)
周嘉洛和吳偉豪分別接受《晴報》訪問，嘉洛表示《愛回家》的確帶挈咗唔少廣告畀佢：「我始終係新人，價錢相對平啲，我覺得廣告帶畀我嘅意義超越金錢，對我而言係一種證明。有人欣賞我，有人覺得有價值，係一種推動力，好開心有呢啲拍劇以外嘅機會。」而吳偉豪就表示唔抗拒HEHE，亦唔擔心會因此失去劇入面正路的感情線，因為編劇只係滿足觀眾，只要觀眾鍾意就寫多啲。吳偉豪話雖然拍攝HEHE戲時，一睇劇本會覺得：「嘩，點做呀！」但去到正式拍攝時，就會好專業，唔覺得尷尬。安仔就話平日只是兄弟情的劇情就好容易處理，只是上次要為拍片而扮拍拖，的確有少少尷尬同不知所措。
至於講到《愛回家》拍感情戲，周嘉洛飾演的金城安分別跟Bonnie、池美麗同朱凌凌都有感情戲份，問到最鍾意邊條感情線，佢話：「同各人合作都有所得著，三個之間要揀的話，比較起上嚟我同吳偉豪合作得最長時間，比較容易接受佢嘅戲路同掌握到對方嘅節奏，默契會好啲。」嘉洛同吳偉豪直言拍攝當日都食好多點心，希望將來的廣告都可以愈來愈多，吳偉豪搞笑說：「我哋好平架，快啲搵我哋拍廣告啦！」
《愛回家》入面，安凌CP已經成為觀眾好支持嘅一對。(圖片：《愛回家之開心速遞》電視截圖)
就係呢幕，原來幾熟嘅兄弟都會有少少尷尬。(圖片：《愛回家之開心速遞》電視截圖)