林偉於TVB新劇《鐵探》飾演黑社會「山狗」一角，佢可謂「TVB御用惡人」，岀道多年演過唔少社團人士、匪徒，不過現實生活入面，林偉係個斯文乖仔，而且非常孝順。
（TVB電視截圖)
（TVB電視截圖)
林偉細細個嘅成長環境唔算好，佢喺家中排行最細，對上有一個家姐同三個哥哥，爸爸好早過咗身，所以係媽媽一手湊大佢哋幾姊弟。單親媽媽要照顧咁多個小朋友唔容易，加上佢哋屋企好窮，當時有一段長時間都喺銅鑼灣勵德邨附近嘅木屋區住，後來先有機會搬到灣仔。林偉亦深知，無媽咪嘅照顧就無今日嘅佢，所以佢一直好錫媽咪。現時林偉媽咪已經90歲，年紀好大，最近更患病臥床，身體完全郁唔到，林偉亦好心痛：「媽咪都好努力同我傾計，所以我好珍惜見面嘅每一刻，想令佢開心咁笑。」
（林偉微博圖片)
除此之外，林偉亦勉勵一眾年輕人，身體髮膚受之父母，要好好珍惜生命，帶嚟滿滿嘅正能量：「有咩唔開心千萬唔好自尋短見，如果唔係父母會傷心。人生實有好多高高低低，唔係每個人都可以平步青雲，我都喺娛樂圈10幾20年，曾經浮浮沉沉，我一直都係好樂觀咁看待呢一切，唔開心咪做運動減下壓。」
（林偉微博圖片)
林偉嘅態度好正面，好值得大家欣賞。事實上佢岀道多年，的確面對過不少高低起伏。林偉做演員前有過一段做模特兒歲月，你哋又知唔知呢？佢曾參加模特兒訓練班，當時仲同李嘉欣係同班同學，到1987年林偉開始做全職模特兒，於世界各地演出，名氣漸漸增加，廣告接唔停手，90年代中期佢更稱得上係「亞洲名模」。
（林偉微博圖片)
喺模特兒界打響名堂，林偉好快獲公司引薦拍電影，1986年佢客串演出電影過《兄弟》，之後林偉發現自己對演戲有好大熱誠，繼而入讀香港演藝學院修讀戲劇系課程，隨後放棄模特兒工作，正式投身演藝界。讀完書後，林偉1992年正式加入TVB，慢慢更變成劇集「御用黑幫大佬」。做咗咁多年戲，就算無一個角色令佢爆紅，又無機會做男主角，林偉依然默默堅持下去，繼續演戲㗎！
（TVB電視截圖)
（TVB電視截圖)