大家食完橙後，會否直接將橙皮當垃圾丟棄？一名有心的港媽為了不浪費食物，遂將橙皮煮成糖，並將製法放到其Facebook專頁「Kelly媽媽愛的味道」無私分享。港媽Kelly接受《晴報》訪問時表示，除了橙皮外，柚子皮亦一樣可以製成糖，「之前見有人會用柚皮橙皮檸皮煮餸，我就索性試吓用來整糖食，又估唔到原來咁好食！」
「食完嘅橙皮唔好浪費，留返來煮橙皮糖，大人細路都Very like㗎！」Kelly表示，自己起初先試整柚子皮糖，讓小朋友當零食吃，「我大仔鐘意食，細仔唔鐘意食，但我試用橙皮整佢哋兩兄弟都話好食！」因此，她以同樣做法製成橙皮糖，並將自家食譜放到網上公諸同好。
以下是Kelly的橙皮糖簡易食譜：
首先要揀選厚皮又大隻的橙，「我兩個小朋友乜生果都啱，所以一日食兩隻，我會用廚房紙包好啲皮再放保鮮袋包好放雪櫃門格，所以我儲兩日就可以煮啦！」
第1步：先將橙皮用粗鹽逐塊捽吓佢，然後加水浸過面浸泡大約1-2小時，把水倒去
第2步：另煲滾水放橙皮加適量粗鹽，待再滾起熄火原煲浸泡一晚（大約7-9小時）
（*此兩個步驟是為整走皮外層的蠟等等，並令橙皮更為軟身。）
第3步：將皮隔去水，把果襄（白色部分）片去1/3，然後切片如上圖
第4步：切完再用流水一路沖一路揸下啲皮（以去除苦澀味），此步驟大約5分鐘
第5步：加清水、冰糖及橙皮一齊落煲（如上圖），冰糖大約200g配4隻橙皮（如果喜歡酸酸地可以加入一些檸檬汁），開火煮滾至收汁
第6步：煮到如上圖就不要離開啦，要一直攪拌唔好俾佢痴底，按個人喜好，想乾啲就煮到收晒汁先熄火，我就鐘意少少濕唔好太乾就撈上碟，攤乾後灑少少白砂糖喺面
完成啦！
柚子皮糖的煮法亦一樣：
對此，營養師黃薇表示，橙皮有化痰、消炎的作用。當整橙皮糖及柚子皮糖時，首先要徹底清洗乾淨果皮，並應要注意鹽及糖的用量，製成後不要一次過大量食用。「焗乾收水後不易發霉」，她建議，可以用焗乾的方式來代替傳統用鹽及用糖來防腐的方法，以減少食用時攝取過多鹽份及糖份。