曾為老婆拒拍親熱戲 陳錦鴻停工多年 照顧自閉愛兒

ViuTV月底將會播出新劇《婚內情》，劇集主要探討現代愛情故事，由鄧萃雯擔任女主角，而男主角則是好耐都冇拍劇嘅陳錦鴻。喺劇中，陳錦鴻飾演一名已婚畫家，同鄧萃雯結婚多年，但卻背住老婆不斷出軌。今次呢套劇，陳錦鴻可以話係豁出去。事關佢同杜雯惠拍拖時，曾講過唔會接拍親熱戲，因女友介意，同埋唔想令家人唔開心。後來成為人夫，更將底線「升級」，連感情失德嘅劇集都拒絕。而佢亦有信守諾言，從影多年嘅佢，的確大多出演循規蹈矩嘅好男人，如：《老婆大人》及《大冬瓜》等，形象非常正面。今次新劇有咁大突破，陳錦鴻就表示太太十分支持。其實喺現實生活中，陳錦鴻唔單止係好老公，更係一位廿四孝好爸爸！

{{hket:inline-image name="DSCF0626.jpg"}}{{/hket:inline-image}}

{{hket:inline-image name="DSCF0115.jpg"}}{{/hket:inline-image}}

陳錦鴻同老婆杜雯惠，婚後3年生咗囝囝陳駕樺。後來兩公婆發現囝囝患有自閉症，除咗學習能力緩慢，同其他人溝通有障礙外，情緒亦較容易波動，仲出現過度活躍徵狀。陳錦鴻為此決定全面停工，放低一切，將所有時間畀晒囝囝。當時陳錦鴻除咗每星期親自帶囝囝去接受言語治療，仲為咗令佢有個更舒適嘅環境成長，一家人搬到鄉村生活，遠離煩囂。

{{hket:inline-image name="79cd3ca5jw1ea8xcvxxpmj20qo0hl77d_307134508587c809656339.jpg"}}{{/hket:inline-image}}

陳錦鴻更為囝囝付出無限耐性，佢曾表示，用咗5年時間教囝囝去廁所，而一啲日常生活嘅事情，如刷牙、洗面等，都會親自示範，同拍片畀囝囝睇，等佢慢慢學習。陳錦鴻坦言係需要好多時間同心機，但為咗囝囝係絕對值得。結果皇天不負有心人，近年囝囝嘅自閉症情況得以改善，陳錦鴻仲透露正忙於幫囝囝搵中學，仲話會同囝囝一齊欣賞今次拍攝嘅新劇！

{{hket:inline-image name="79cd3ca5jw1ei4d9i5smgj20sc18gtjf.jpg"}}{{/hket:inline-image}}