志偉66歲生日設齋宴籌款

昨天（14號）是曾志偉的66歲生日，人緣甚佳的他，每年舉行生日party慶祝外，亦會舉辦生日齋宴籌款。志偉表示搞齋宴已超過15年，每年都設特別主題，並為不同寺廟籌款。

前晚在佐敦舉行「南京定山寺慈善素宴」，筵開47席，一眾好友包括張慧儀、朱潔儀、歐瑞偉及錢小豪等亦有出席。志偉希望籌得500至600萬元，他說︰「會拍賣一啲佛教物品，以前仲要搵人買枱，但近年好多善心人主動聯絡我哋留枱，甚至係留定下年嘅枱。」

問志偉66歲生日如何慶祝？他笑言︰「唔知，都係交畀其他人搞，『四月之星』一齊慶祝，上年就有錢國偉、衛蘭衛詩兩姊妹。」他又指近日已開始慶生，前晚已經喝醉︰「呢幾日食咗三、四個蛋糕，其實由前日下午開始安排，如果搞大型生日會，唔知邊個嚟，邊個走，所以分開搞。」問到囝囝曾國祥及未來新抱王敏奕可有為他慶祝？志偉直言兒子未必正日慶祝，他亦不清楚有哪些好友出席，總之生日願望係行得、食得、飲得、瞓得。

張慧儀拍ViuTV新劇

張慧儀與志偉相識多年，她透露︰「《M Club》有張枱，不過唔知邊個成員出席，總之有時間就嚟聚下。」她又表示月底為ViuTV拍劇，但暫時不能透露太多，「角色有挑戰性，去年《荷里活有個大老千》出咗街後，我都物色一個有挑戰性嘅新角色，點知開口中，所以就接咗。」

此外，吳君如與導演陳可辛的愛女陳是知13歲生日，君如前晚在微博Po相，見到是知已經長得亭亭玉立。

撰文︰Pauline

編輯：陳禮恒

美術：梁政敏