香港時裝品牌上海開Show 體驗新零售快閃店

香港時裝界喺國際享有盛名，黛安知道貿發局上個月，就帶咗16個香港時裝和配飾品牌，參加上海時裝周同期舉行嘅Ontimeshow，仲舉行咗Fashion Hong Kong ACTIVE！（互動時裝展示），聽講吸引咗超過370名買家、傳媒和時尚達人出席！

聽公關姊妹講，互動時裝展示喺上個月30號舉行，以野餐和國際象棋做主題，演繹咗12個時裝品牌，包括112 mountainyam、Ade.C等等，陣容非常鼎盛。姊妹話，今次仲第一次同上海時裝周官方新零售快閃店-FUSE新掀店聯乘合作，喺上海新天地廣場嘅REFRESH區，展出6個香港設計師品牌，打造為期一個月嘅綫上綫下一站式零售模式，除咗可以喺店入面睇到香港設計，亦可以掃描展品架上嘅Wechat QR Code，實時獲取產品資訊，並透過FUSE網店即時訂購全新系列。展覽去到今個月25號，有興趣嘅朋友都可以去體驗下。

嚟緊9月4號至7號，貿發局舉辦嘅CENTRESTAGE（香港國際時尚匯展）會喺會展登場，黛安都約埋班姊妹去開下眼界先得。