日前爆出許志安與黃心穎車廂偷食事件，全城都對「受害人」馬國明與Sammi寄予無限同情。繼許志安首日急開記招爆喊道歉之後，馬國明昨日亦開腔回應事件！全城激讚馬明係「真●好男人」，有風度、為各方着想、雖然係受害者但唔會落井下石，大家都認為馬明「Deserve better」呀！
45歲嘅馬國明其實一向都出名係圈中嘅「筍盤」，孝順專情之餘緋聞甚少，唔爛玩唔鍾意蒲，工餘時間就同朋友踢波，或留喺屋企睇戲、睇波聽歌同上網，佢曾稱自己可以幾日足不出戶，黐家到極。面對幾多索女Partner馬明都係目不斜視，馬明主演嘅電影《美麗戰爭》入面要同十八個長腿超模對戲，導演陳勳奇勁讚馬國明乖仔：「佢好君子，拍完戲就同劇組返去休息，大家都對佢讚口不絕！」網民都好心痛馬明嘅忠誠最後竟然被背叛，個個奶奶上身，Scan晒佢身邊嘅所有女性揀「家嫂」！
李施嬅就讀於多倫多大學主修會計，2003年回港參選香港小姐競選，奪得「最上鏡小姐」及「才藝小姐」獎項，李施嬅則被傳媒視為決賽三甲大熱門，最後大熱倒灶未能晉身前五名。入行多年緋聞唔多，形象正面！
馬國明及38歲李施嬅早在2004年時拍攝無綫劇《本草藥王》正式合作，先後五度做螢幕情侶，當年戲裏戲外都話題多多，被指係金童玉女，不過佢哋異口同聲強調從未過電。但馬明曾話覺得李施嬅好靚女、好有古典美又顧家，仲要嬌小玲瓏，話自己鍾意啲細細粒嘅女仔。施嬅都曾經講過撻唔撻得着都係要睇吓timing，話可以識個人十年都撻唔着，但無端端撻得着。馬明當年話可能大家都唔係好急搵另一半，就冇令件事發生。馬明想女友為他打點一切，而施嬅就不介意幫男友計畫將來，非常夾呀！
現年37歲嘅胡定欣2009年曾與馬國明傳緋聞，在二人分手後，在2012年經馬國明證實曾拍拖約兩年，並和平分手，現時維持好朋友身份。胡定欣曾話一直都希望馬國明可以遇到一個好女仔，好好咁發展吓，依家胡定欣都仲係單身，而且仲到咗適婚年齡，唔知佢會唔會就係馬明嘅Mrs.Right？
現年37歲嘅唐詩詠一直予人嘅感覺都非常Girlfriendable，同「筍盤」馬明可以講係非常合襯。身材完美比例，近日開埋甜品店做老闆娘，有樣，有身材，又有腦，仲冇乜負面新聞！前年同洪永城嘅戀情告吹，已經有好多網民希望佢哋一齊！
唐詩詠同馬明因為2009年拍攝《鐵馬尋橋》成為契兄妹，相識多年，有指馬明一直都對詩詠有心，當時唐詩詠有崔建邦，馬明有胡定欣，未能發展成情侶關係，之後二人恢復單身，又有其他合作，馬明都不只一次暗示唐詩詠係好女仔，不排除有發展機會。
陳煒參加1996年亞洲小姐競選入行，早年同比她佢年紀細三年的台灣商人顏志行離婚，到依家都仍然咁索。唔講唔知，原來陳煒同馬國明同齡，二人曾拍咀戲，一齊提名視帝視后，互撐對方。唔少網民都覺得佢哋好襯！
不過都有網民認為馬明份人咁老實，應該搵個簡單啲嘅圈外人拍拖，亦有人認為馬明專心事業都可以活得精彩，拍唔拍拖都冇乜所謂咁話。