廚房紙細菌含量超標 專家話︰呢樣細菌仲多【強嫂家務小知識】

大家好啊！又係我強嫂啦！今日係一連四日嘅復活節假期，強佬同班仔女終於放假，而要返工嘅咪就係我囉！對於我嚟講，呢個星期除咗係「安心事件」最爆外(女人最大公敵就係小三)，消委會公布測試廚房紙含菌量超標真係我Top 2最爆！你哋知唔知，廚房紙簡直就係我朋友，我嘅小助手，吸油又得清潔餐具又得！

睇返消委會個報告，15款廚房紙佢哋就分咗兩批咁買，係首批就發現有4款嘅樣本細菌達到每克240至490克，超出內地嘅標準！睇完真係嚇到我心都離一離啊！即刻就打俾我老友陳Sir問問到底食落肚會唔會影響我啲強仔強囡健康啦！

「睇返個報告，廁房紙嘅細菌量未算好嚴重，冇直接檢出有可致病嘅黃金葡萄球菌。如果真係食物中毒，都要睇埋食物本身嘅溫度同埋環境。」我老友就叫我唔使太擔心，咁諗諗下又係嘅！平時我一日三餐都會用到廚房紙，佢哋都係咁健健康康！不過最好都係小心保存食物，同埋揀返有品質保證嘅牌子囉！

碗布比廚房紙更高細菌風險
陳Sir建議，保存嘅廚房紙最好放返喺乾爽地方，如果唔係就容易有霉菌滋生係紙啦！相反，陳Sir提醒我平時廚房裡面用嘅碗布，比起廚房紙嚟講，出現細菌的風險更高。特別係抹完砧板之後，洗兩洗再用嚟抹其他嘢更危險。仲有抹完就一定要掛起佢，等塊布通下風，細菌最鍾意係潮濕地方生長！

陳Sir 就建議，每次用碗布前都可以用滾水沖洗碗布幾分鐘。用完之後，可以再稀釋少少漂白水，清潔碗布。咁就可以達到最殺菌效果啦！不過我覺得，最重要都係分開幾塊唔同功用嘅碗布，免得交叉感染啦！

(嗚謝香港專業教育學院（柴灣）應用科學系食品科技及安全講師陳子聰)

精選健康知識，盡在 Healthy Life 健康男女
https://fb.com/HealthyLifeExpress/