正常人，慎入！

2星期前

《淪落人》，其實都是一班傻人。

相信菲傭？同枱食飯？兼幫佢實現夢想？半身不遂的昌榮，竟然咁傻做呢啲！

有舒服筍工唔轉？有得轉行又唔轉？情願咁辛苦住屋邨照顧大小二便？菲傭Evelyn又是傻嘅！跟過一日大佬就一世大佬？曾經對你好就從此義犬報恩，付出真心同關心？昌榮的舊工友傻得好離地。

「情與義，不值錢」，這是常識吧？身邊的朋友、阿媽阿妹已經畀晒意見同tips，這班傻人竟然勸極都唔聽，做人不計較、不計算，物以類聚，傻埋一堆，卻又活得心安理得，快樂自在。唉，都說是夢工場，電影而已。

想不到隨即看到一宗新聞，有精明僱主硬炒患癌外傭，同時間這外傭好姊妹的僱主卻又好心收留兼協助告上法庭——傻人，原來在現實中存在。Imagine世界少啲清醒叻人，多啲這一類傻人……You may say I'm a dreamer...

3天前

我們給H起了個「朵」，叫做「情與義」，平時做人高調大大聲，幫朋友卻保持低調唔出聲。你上台拎獎，她會拉隊撑場支持；你開公司做小生意，她一有機會就向人大力推薦，事後才從旁人口中得知；你偶爾提到想要做的事，自己都忘記了，她卻原來已經幫你穿針引綫……

當然，「情與義」必須建基於有來有往的信任和真心。

我也是傻人一個，仲要係心急人。朋友一個電話或短訊，求問求助求介紹求支持，我通常立刻行動，又不是要赴湯蹈火、借錢做擔保，只不過是舉手之勞，多口幫人問多幾句，又或者奉獻少少時間、給予精神上的支持……不算是甚麼恩，從來也不望報，但我以為起碼大家畀個心出來。只是多年來的經驗告訴我，原來有些人只回報你「心淡」個心。極度失望卻又非常理解，世情就是如此。

幸好，身邊仍有很多開心傻人，I'm not the only one！

（本欄逢周二刊登）