謝霆鋒入廚當修行

謝霆鋒主理的電視節目《鋒味前奏》，日前播出第八集，兩位主持人劉翁同火火食喇沙食得津津有味，兩人繼續同霆鋒交流煮食心得，霆鋒直言在廚房工作，也是一種修行。

入廚多年的霆鋒，自有一套廚房學問，更讓他學懂做人不能太執着，以及要學懂時間管理，他解釋：「點樣可以上齊八道菜，保持每道菜仲係暖？喺寫餐單時已經要編排好煮食次序，每一道菜都暖，咁呢餐飯就溫暖喇！」

自爆唔鍾意化粧

劉翁問霆鋒是否喜歡台灣的小店，例如魯肉飯店。霆鋒聞言後「嘩」一聲再回應︰「好食嘅地方永遠都係人少少，你睇好食嘅日本餐廳有無超過12人嘅座位？其實好少見。」霆鋒自言最鍾意的台灣美食是薑母鴨，「呢道菜由好多唔同藥材、麻油、鴨骨，煲成一個濃郁嘅湯底。」劉翁把薑母鴨理解成「鴨版的醉雞鍋」，令火火同霆鋒忍不住爆笑。

當兩位主持人食到差不多捧腹之際，霆鋒才開始為自己的喇沙擺盤。火火盛讚霆鋒碗麵擺得如藝術品般，但霆鋒表示並非每次都會肯花心機擺盤，劉翁在旁取笑他擺盤仲緊張過執自己個樣，霆鋒直言點解要化粧，還說如果要化粧就會好𤷪𤺧，火火即抵死拋下一句︰「佢（霆鋒）個樣唔使執嘛，大佬！」

撰文︰Pauline

編輯：陳禮恒

美術：梁政敏