《復仇者聯盟4：終局之戰》今日正式上畫，首日上畫已經成就出色的票房佳績， 首天票房在截至下午4點，已經衝破1600萬港元，打破香港開畫票房紀錄。而內地、台灣和世界各地的戲院都出現長長的人龍，不少死忠的復仇迷，為了第一時間睇到新片，不惜凌晨5點開始排隊，睇晨早的6點場次，五月天主音阿信正是其中一人，而商台DJ Donald同樣晨早8點15分就去尖沙咀捧場，大讚精彩之餘，更呼籲大家帶定紙巾入場。
五月天阿信朝早6點就入場睇戲，到底係早起身定未瞓過？（圖片：阿信IG截圖)
DJ 當奴朝早8點幾就入場睇戲。（圖片：唐劍康IG)
DJ當奴直言好想穿上美國隊長打扮入場睇戲，可惜都係唔夠勇氣。（圖片：唐劍康IG)
雖然「美國隊長」基斯伊雲斯特別拍攝嚴禁劇透的宣傳照，加上好多劇透的詛咒，但都難以防範劇透的人，所以大家唯有盡早享受，免得心癢癢。C君帶同未婚妻黃天頤睇中午場，絕對是拍拖最佳活動，連好友張繼聰都留言話：「好羨慕呀！」事後他接受《晴報》電話訪問，問到觀後感，C君說：「啱啱睇完，已經即刻買咗聽晚飛再睇，哈哈，我諗大家對《復仇4》都好大期望，能夠唔令大家失望已經好難，仲要令人覺得咁好睇更加難，好值得睇咖！你快啲去睇啦！」不過網上見到他的好拍檔鄭裕玲玩模型無限手套過癮，未知當她知道C君無預佢睇戲，會唔會話：「作死你呀？」而復仇者迷的歐錦棠更吟詩求求大家不要劇透，知道冇？
C君同未婚妻入場朝聖。（圖片：鄭詩君IG)
歐錦棠直情要吟詩表達對劇透的抗拒。（圖片：歐錦棠Facebook)
歐錦棠的留言如下：
「明天逢人都身痕，想睇復仇者聯盟
煲足十年為哩部，唔睇好難有得瞓
個個爭飲頭啖湯，遲咗一日都冇癮
買唔到飛等第日，毋須心急莫發忟
最驚嗰班叻唔切，飛卜些牙扮達人
早睇唔等如發達，最重要係講人品
未睇嗰班被穿崩，做觀眾情何以堪
唔係話危言聳聽，劇透俾人數家珍
你唔介意俾人咒，無謂連累屋企人
總之邊個衰多口，品格等同犯姦淫
#咪L劇透 #復仇者聯盟4」
其實無飛又點只歐錦棠，身為視后、身為靚女嘅李佳芯（Ali）一樣無飛，佢在Instagram上載戲院劃位圖表，幾乎只賣剩頭一行，她留言說：「no more...no more....」網友紛紛留言話可以讓給她，而好友朱千雪搞笑留言叫她揀個最側邊單丁位，傻瓜，Ali有男朋友陳炳銓呀嘛，一張飛點夠睇？
李佳芯上載戲院座位表慘叫「no more」。（圖片：李佳芯IG)
李佳芯無飛入場睇慘慘豬，唔知男朋友陳炳銓會唔會即刻去撲飛呢？（圖片：李佳芯IG)