勿劇透！羅列睇《復仇者4》應有禮儀 MCL發文籲做高質觀眾

全球影迷期待已久的《復仇者聯盟4:終局之戰》（Avengers: Endgame），終於在今日上映！MCL戲院亦趁機以「俾你踢過無數次的戲院櫈」的身份發長文，羅列切勿在睇戲討論劇情等多項睇戲禮儀，呼籲觀眾欣賞《復仇者4》時做個高質觀眾，獲得一眾網民激讚。

{{hket:inline-image name="endgame240420198.jpg"}}{{/hket:inline-image}}

網民一度以為執笠

MCL昨晚突然在Facebook專頁發出一封「給觀眾的信」，由於圖片只用黑白兩色，氣氛有異，讓不少網民一度以為是結業通知。原來，該封信旨在提醒觀眾，睇戲時應遵守應有的禮儀，「唔經唔覺，咁就一齊咗10年喇，大家喺度都留低過唔少腳毛。從第一套Iron Man到依家，由菲林進展到去4k，好開心可以陪住你哋一齊笑過、喊過、緊張過、感動過……咁多年嚟，一齊經歷咗咁多嘢，我好想好想襯今次同大家講下心聲……」

{{hket:inline-image name="endgame240420197.jpg"}}{{/hket:inline-image}}

勿遲入場 提早拎飛

首先「俾你踢過無數次的戲院櫈」向經常遲入場的觀眾表示，雖然明白他們的苦處，「我知你哋無心遲入場，無心攪到自己睇唔到片頭之餘，仲要喺入場時完美地block晒其他觀眾嘅視線。不如今次試吓準時一次咁多吖？」同時，「戲院櫈」又勸大家切勿只提早10分鐘到場拎飛，「好想話你知……當你落到戲院，望住拎飛條隊個刻，真係會睇唔透。個個都開場前10分鐘先拎，成件事就唔止係10分鐘架喇。唔想排到天荒地老嘅，不妨試下用QR code入場，又或者再早多啲啲嚟拎飛呀。」

自己垃圾自己帶走

此外，「戲院櫈」又向習慣完場後留低爆谷、汽水、紙巾等垃圾的觀眾表示：「多謝你，下次唔洗咁客氣喇，食剩嘅食物麻煩自己帶返走呀。我唔想你哋為咗我，苦了啲清潔姐姐呀，求放過。」最後，「戲院櫈」深情地呼籲：「其實我哋可以見證到一個持續咗10年嘅故事嚟到ENDGAME一刻，真係唔簡單。戲院，係一個為大家留下回憶嘅地方，希望大家可以珍惜每一個movie moment，做個高質觀眾。唔怕話你知，我都好想以後繼續同你地一齊經歷每一個座無虛席嘅moment。」

以下是「戲院櫈」羅列出最需要注意的要點：

P.S. 今次套戲都至少要坐３小時，記得去完洗手間先入場呀

P.P.S. 唔好再喺睇緊戲個時討論劇情喇，有咩返屋企再慢慢講

P.P.P.S. 睇戲途中影相偷拍呃like撳電話就更加唔好啦

P.P.P.P.S. 千祈唔好劇透，千祈唔好劇透，千祈唔好劇透

網民大讚高質

對此，不少網民大讚MCL的長文十分高質,「邊個寫嫁，加佢人工！」、「講得好，一定要俾讚」、「高質小編」、「竟然嚴重到驅使admin出求情信……辛苦了」。同時，亦有網民表示不少觀眾「好無品」，認為戲院應實行扣分制度，「扣夠10分要double戲飛錢，得返一半要上戲院禮儀改進課程，扣到無晒分要禁止入戲院5年，幫戲院洗地／洗廁所每個鐘加1分」。另有網民提醒，除了文中羅列的禮儀外，亦希望觀眾不要使用發光及響鬧裝置，而且家長亦應好好看管年幼子女，「唔該班家長睇實班細路仔，唔好踢櫈同We嘩鬼叫！」