做facial的男人

發佈時間: 2019/04/25

做facial的男人

我知有點衰,但看見報紙頭版那些所謂「俊男」、「暖男」,第一次約女仔去街,竟然是約去做facial,真的很難不爆笑。

男人喎,好人好姐,又不是靠個樣搵食,怎會把做facial看成頭號大事?甫認識,就甚麼都不聊,甚麼都不做,先來齊齊做面!就算是真,和這種比你還貪靚姿整的男人,真的可以過人世嗎?

第一次約會,忐忐忑忑,甜甜蜜蜜,千千萬萬樣事情可以做,吃個飯、睇場戲、行山、跑步、打羽毛球……就算行商場購物都好呀,總勝過第一次見面,連相貌都未認清,就各自躺在不同的美容床上,敷上厚厚的面膜,偈都無得傾。這種約會,你真希罕麼?

唉,這都算了,特價試做完,還幫口sell你買幾萬元的套票,你仲睬佢?永遠都話,巴不得社會繼續重男輕女,巴不得男性都是能為妻兒扛起重擔的大男人,所以關鍵時刻,不要逞強,應該扮可憐、扮嬌俏、扮小鳥依人︰「耶,人哋呢幾個月使大咗呀,仲欠咗財仔筆數,既然你當人哋女朋友,不如你幫我碌住卡先喇,咁我哋咪可以日日做……facial囉!」哈,擔保他丟下一句粗口就掉頭走!

(本欄逢周二、四刊登)

撰文: 姚鈴 心繫時事,愛恨分明的企業女高層
欄名: 不吐不快