前港男梁裕恆連環發表言論力撐黃心穎後，一直被網友留言斥責，指他不分是非黑白，只為抽水博上位，但梁裕恆驚都未驚過，更直接指網民為鬧而鬧，沒有看出事件的真相。到底真相是甚麼？他昨晚在youtube上傳自拍短片，分享他對「安心偷食」事件的睇法，當中他多次質疑事件的真確性，十足查案一樣。他表示：「車入面有4個角色，一個負責揸車嘅，一個係第三者，即係肥仔，冇咗肥仔成件事能唔能夠成功呢？嗰個揸車嘅係咪又係單純係揸車咁簡單？香港所有車都係右軚，而所有車cam正常都係會影住左手邊，因為乘客通常都係喺左手邊上落，當晚許志安坐右手邊，點解個車cam一早會對住右手邊？佢點樣可以一早預先知道許志安會坐喺右手邊呢？車入面邊個角色做到呢件事？」
到底梁裕恆係做健身教練定係私家偵探呢？（網上短片截圖）
梁裕恆連日來言行大唱反調，被指是博出位。(圖片：梁裕恆IG）
他表示雖然在車廂入面，但正常人有第三者在場都不會去攬攬錫錫，他說：「佢哋係知名人士，許志安呢啲咁經驗豐富嘅藝人，正常唔會犯呢啲咁低級嘅錯誤，一定有原因。會唔會係個司機本身就係相熟、知道呢件事呢？坊間有流傳佢哋嘅關係其實係默許咗嘅，鄭同許都默許咗大家出去玩，但係許會唔會有機會玩出咗真感情，會唔會係一方想報復呢？發生咗整件事後，最大得益係邊個？喺經濟上最大得益者，邊個宣傳大咗？邊個知名度高咗？邊個受人同情咗？」
梁裕恆重申「安心」這段關係發展兩年，所以絕對不構成黃心穎勾引對方的說法，他更質疑馬明同Sammi在事件發生後冷靜得不尋常，他說：「馬國明嘅態度，好似複述緊一個第三者嘅事，完全睇唔出有任何傷心嘅，大家形容佢係一個好男人，我形容，大家從來都冇愛過，如果愛過，就係冷血㗎喇。鄭秀文當晚就話捉住大家隻手祈禱，然後就傾咗好多偈......大家有冇試過嬲過你老公？發生咗一個咁大嘅事件，即晚去原諒，有冇可能呀？會唔會只係一個公關嘅技巧，背後嘅原因係咩呢？會唔會係一啲商業嘅考慮呢？」他直言企出來撐黃心穎是看不過眼全城去欺負一個女仔。
馬國明冷靜面對傳媒，卻被梁裕恆形容為冷血。(圖片：馬國明微博）
鄭秀文跟許志安一齊祈禱面對事件，梁裕恆又話唔信。(圖片：鄭秀文IG）
黃心穎有梁裕恆呢個好朋友，真係「唔該晒！」。（圖片：黃心穎IG）
短片出街後，網民當然繼續鬧佢，而之前公開寸黃心穎的前落選港姐工藤佑采都加入罵戰，她在社交平台留言說：「港男成日話要幫黃心穎......但係點解我覺得佢先可能係最唔鍾意黃小姐嫁(嘅)人！成日將歪理講成道理」。
工藤佑采指梁裕恆將歪理講成道理。(圖片：工藤佑采IG）