講起呢個人，腦海都會浮現出佢嗰副厭惡全世界嘴臉，彷彿呢個世界冇嘢係合佢心意、做乜都會畀佢彈到體無完膚；佢講嘢嘅聲調高亢刺耳，一開口你會想車巴佢黐埋牆暈7日……不過，佢喺演藝圈搵到自己嘅一片天。
馬蹄露1996年經曾志偉介紹進入無綫，1997年就拍攝咗佢第一部處境喜劇《真情》，直到今日，大家都記得佢叫MayMay，而May May當年跳樓自殺嘅一集，仲有成270萬之多觀眾捧場，有成43點，打破歷年戲劇及處境劇過往最高收視率，亦成為長達1128集的《真情》最高收視的一集，馬蹄露憑May May一角喺無綫30周年台慶頒獎禮《萬千星輝頒獎典禮1997》榮獲「最厭惡角色演繹獎」，做醜角做到咁出位，仲要成為經典。都可以話係前無古人，後無來者。
曾經試過畀一個鄰居嘅小朋友兜口兜面話佢醜樣，馬蹄露唔介意自己被指醜樣，佢最介意係不被尊重：「可能人哋真係會覺得我好醜樣。我唔靚，但係我乾淨、整齊、整潔……其實係咪都應該學會尊重人呢？己所不欲，勿施於人。」
人生最大遺憾
馬蹄露最大嘅遺憾係喺佢爸爸過身之前都完成唔到佢想買一個3房單位嘅心願，再提起佢都仍然忍唔住喊：「我覺得自己唔夠叻，搵唔到多啲錢完成爸爸嘅願望。」雖然後來佢同家姐夾份買咗個3房單位同媽媽住，但佢仍然耿耿於懷。
「醜」出國際的愛情
雖然佢喺華人眼中唔靚，但卻係老外眼中嘅標準東方美人。1998年離婚後，馬蹄露有唔少老外筍盤追求，包括美籍意大利教授Mark，同德國生意人男友。Mark曾經喺美國哈佛大學做研究員，依家係美國Stone Brook University嘅數學系教授。當年Mark來香港做訪學，經朋友介紹下認識馬蹄露，2人隨即撻着。
意大利教授Mark
因為愛而分開
之後馬蹄露不時飛去美國會情郎，可惜戀情只係維持咗一年左右：「其實同佢一齊時係好開心，佢會煮嘢畀我食。佢好錫我，喺美國唔准我一個人去街，因為怕危險。至於分手原因，唔可以講係性格不合，而係佢覺得我用好多時間照顧屋企人，當時嗰刻我覺得佢挑戰緊我同家人嘅親情關係，依家諗番我覺得自己係衝動咗，因為呢個分歧，所以我決定唔同佢一齊。喺美國時佢有講想同我長遠發展，依家諗番可能佢太鍾意我，先覺得家人霸住咗我啲時間。」 對於同Mark分手，馬蹄露話唔揼心，係對方走寶。馬蹄露直認鍾意外國人，事關夠高大靚仔！她說：「我唔靚啫，但我可選擇個靚仔嘅人做男友，我個人都要對自己有自信。有時打扮得宜，豬扒可以變女神。」佢話醜角都貪靚，馬蹄露都鍾意用美顏相機。
「司徒孤獨明珠」呢個名隔住螢幕都有陣怨婦味。
51歲的馬蹄露有感自己年紀漸大，戲路限制愈嚟愈多，因此想喺「埋單」前盡量做。馬蹄露Keep住喺無綫拍戲，喺《愛．回家》入面飾演佢最拿手嘅「極品怨婦」，雖然冇好大突破，不過佢仍盡力演好每個角色：「不過每個演員都唔想被定型，我哋都有好多可能性。」佢近年仲有同佢嘅姪仔一齊拍Youtube片，引起咗唔少討論，其中有一啲仲係比較負面，令到馬蹄露忍唔住反擊：「一套戲只可以有男丶女主角，其他冇配角、長相唔靚、跑龍套、臨時演員完全容不下，要靚既（嘅）才可當演員？」
馬蹄露與姪仔馬米高
萬貴妃與百合都係一個經典衰人組合！