商台著名DJ少爺占（甄子康）做節目岀名風趣幽默，轉數超快，喺觀眾面前成日扮鬼扮馬，現實入面，佢係個對感情非常專一深情嘅好男人。少爺占同老婆（冼燕珍）結婚13年，育有可愛囝囝甄和天（Timmy），兩公婆一齊咁耐仲係勁甜蜜，好似啱啱開始拍拖咁。近日佢哋仲撇低兒子，到日本旅行享受二人世界，少爺占少有上傳同老婆嘅合照，之後甜蜜咁話：「要照顧兒子這幾年我未見過你休息，沒有一天睡超過五個小時。難得Timmy 選擇去爺爺嫲嫲家，隨時可兌現，只要你肯跟我走。難得的四天東京，而蜜月期沒過去......」
（少爺占同太太於日本二人世界,少爺占IG圖片）
（少爺占IG圖片）
其實少爺占同太太相識多年，二人情定幼稚園，稱得上青梅竹馬，後來喺中學重遇對方，就開始拍拖，一拍就17年！直至06年，佢哋於情人節秘密結婚，而婚事都好低調，只有雙方家人先知。到咗2013年少爺占先公開已婚秘密，喺Facebook向太太發表愛的宣言。阿占同太太一齊咁耐，二人到底有咩方法為愛情保鮮呢？
（阿占同太太係幼稚園同學）,少爺占IG圖片）
為對方製造驚喜
間唔中製造驚喜，可以為夫婦感情加溫。好似早前少爺占生日，老婆為令佢有難忘嘅一日，一早就約定一班好友同佢慶生，仲大玩驚喜，整埋少爺占鍾意嘅多啦A夢蛋糕，搞到佢鬼咁感動。而少爺占都好sweet，當囝囝Timmy去上堂，中間有幾個鐘空檔時間，佢會花心思安排短短嘅約會，比驚喜老婆，同佢去玩。
（少爺占IG圖片）
（老婆生日，阿占特地帶佢到外國慶生，少爺占IG圖片）
爭取夫婦獨處空間
少爺占婚後一家三口不時外出享受天倫樂，但偶爾都會撇甩囝囝拍拖，製造夫婦獨處空間！試過有人見到兩公婆去咗銅鑼灣撐枱腳，揀咗一間唔太多人嘅Cafe慢慢歎，好識享受！而且少爺占又不時會同太太孖公仔周圍去，一有時間就去旅行，增進夫婦感情。
（把握時間跟太太拍拖,少爺占IG圖片）
公開示愛增加安全感
身為藝人，工作接觸到好多唔同異性，難免令另一半擔心，而少爺占不時喺IG大曬家庭樂溫馨照片。佢又曾公開示愛老婆：「從前我愛上排球隊隊長，她用雙手打出理想。我沒有運動細胞，只能用雙手畫畫給妳。中學生應該談戀愛，拖著妳愛到冬天不怕冷。到了這一天快得似做夢，七年前的這天，我倆在結婚證書上簽署走進人生另一個階段。男孩像我有很多，幸運被妳選中。」呢一切都令太太好安心、好甜蜜！
（少爺占IG圖片）
（不時曬家庭樂照片到社交網絡,少爺占IG圖片）