大專生翻新商場 七彩波浪紋外牆展活力

新生代創意不容忽視，香港知專設計學院（HKDI）早前就安排咗建築設計高級文憑學生組成9支隊伍，參加領展舉辦嘅調景嶺彩明商場外觀設計比賽，結果由孔慶棠同梁嘉麗同學組成嘅隊伍奪冠。

慶棠同黛安講，佢哋嘅作品以「建‧彩」為題，全因見到商場附近樓宇都係啡、灰呢啲深沉色調，加上商場以前設計較傳統同單調，所以翻新時特登用上七彩波浪紋配上菱形圖案，令到設計更年輕有活力。呢個設計唔止評判讚好，連負責翻新工程嘅建築設計公司都好欣賞，專程安排兩人加入公司做3個月實習，做番呢個項目嘅前期設計同落實工作！